-फाइल तस्बिर
मोरङ/ दुई हप्ता अघि उर्लाबारी नगरपालिका ७ मा रहेको दिपक कार्कीको घरमा आगलागी हुँदा घाइते भएका राम नरेश मरिताको मृत्यु भए सँगै मृत्यु हुनेको संख्या ५ पुगेको छ ।
कात्तिक २६ गते लक्ष्मीपूजाको दिन कार्कीको घरमा रहेको स्नेहा ज्वेलर्समा आगलागी हुँदा घाइते भएका राम नरेश मरिताको पनि मृत्यु भए सँगै संख्या ५ पुगेको हो ।
उपचारको क्रममा कीर्तिपुर वर्न अस्पतालमा धनुषा जनकनन्दिनी गाउँपालिका १ घर भई हाल उर्लाबारी ७ मा बस्दै आएका ४३ वर्षीय मरिताको मृत्यु भएको हो ।
सोमबार राति साढे ११ बजे मृत्यु भएका मरिताको अनुहार, छाती, दुवै हात, दुवै खुट्टामा गरी १२ प्रतिशत देखी १४ प्रतिशत जलेको मरिताको शरिरमा करिब ४० प्रतिशत भाग जलेको थियो । मरिता उर्लाबारी–७ स्थित ईटहरा रोडमा यादव फार्मेसी सञ्चालन गर्दै आएका थिए ।
घाइते भएका मध्ये उर्लाबारी ७ का ६८ वर्षीय रुकुमबहादुर कार्की, ४९ वर्षीय हेमकुमार दाहाल, ४२ वर्षीय कुमार तामाङ र ४३ वर्षीय तपन पण्डितको यसअघि नै मृत्यु भइसकेको छ । घटनामा २८ जना घाइते भएका थिए । अझै २० जना घाइतेहरू उचाररत रहेका छन् ।
जसमध्ये १४ जना जेनरल कक्षमा र ३÷३ जना आईसियू र एनसाईसियू कक्षमा उपचार भइरहेको अस्पताल प्रशासनले जनाएको छ ।
