विराटनगर / कोशी प्रदेशको प्रदेश खेलकुद विकास बोर्डविरुद्ध अख्तियार अनुसन्धान आयोगमा उजुरी परेको छ ।
खेलकुद विकास बोर्डले नवौँ राष्ट्रिय खेलकुद प्रतियोगिता सञ्चालन गर्दा ट्रयाकसुट,मेडल, टेन्ट‚खेल सामग्री खरिदलगायतका ७ वटा शीर्षकमा फागुन १५ गते अख्तियारमा उजुरी परेको थियोे ।
अख्तियारले यस विषयमा राय प्रतिक्रियासहित १५ दिनभित्र प्रमाणित कागजात पठाउन फागुन २२ गते बोर्डलाई पत्र पठाएको हो ।
अख्तयारमा परेको उजुरीमा खेलकुद प्रतियोगिताका निम्ति खेलाडीहरुलाई उपलब्ध गराउन खरिद गरिएको ४ हजार २ सय थान ट्र्याकसुट खरिद तथा वितरणमा रकम हिनामिना गरेको, मेडल खरिद, प्रमाण पत्र छपाई, टेन्ट भाडावापतको रकम हिनामिना तथा अनियमितता गरेको ।
खेलाडीलाई उपलब्ध गराइने दैनिक तथा भ्रमण भत्तामा कागज मिलाई हिनामिना गरेको, खेलकुदका सामान तथा सामग्री खरिदमा अनियमितता गरेको,बन्द प्रशिक्षणमा खेलकुदका सामान शीर्षकको ७ लाख, औषधी शीर्षकको ५लाख र विविध शीर्षकको ५ लाखमा बिल मिलाएर हिनामिना गरेको, ६ खेल सामग्री ढुवानीमा ३ लाख हिनामिना गरेको र उद्घाटन समारोहमा शैलेश विष्टले २० लाख खर्च देखाई रकम हिनामिना गरेको विष्टले लिएको ४० लाख पेश्की बिल मिलाएर हिनामिना गरेको आरोप बोर्डमाथि लागेको छ।
