इटहरी उपमहानगरले ७ लेन बाटोको अवरोध हटाउँदै

इटहरी / विराटनगरको रानीदेखि किमाथांकासम्म जोड्ने ६ लेन सडक अन्तर्गत इटहरी क्षेत्रमा राजमार्ग ओगटेर बनेका भौतिक संरचनाहरु इटहरी उपमहानगरपालिकाले डोजर चलाएको छ । इटहरी उपमहानगरपालिकाले शुक्रबारदेखि इटहरीको विराटनगर रोडस्थित दुईवटा घरहरुमा डोजर लगाएर भत्काउन शुरु गरेको हो । रानी विराटनगर जोगमनी किमाथांका ६ लेन राजमार्ग अन्तर्गत सडक क्षेत्रभित्र पर्ने घर टहरा हटाउने अभियान अन्तर्गत शुक्रबारदेखि इटहरीमा डोजर चलाउन थालिएको इटहरी उपमहानगरपालिका प्रमुख हेमकर्ण पौडेलले बताए ।

उनले यो कार्य अब यसलाई अभियानकै रुपमा अगाडि लैजाने उनले बताए । इटहरी क्षेत्र भएर दैनिक यात्रु तथा सर्वसाधारण आवातजावत गर्ने हुँदा आसपासका संरचनाले सडक साँघुरो हुनुको साथै ६ लेन सडक निर्माण परियोजनाले पनि पूर्णता पाउन सकेको थिएन ।

सडक आसपासका संरचना हटाइँदा आवागमन सहज हुनेमात्र हैन, नगरको सुन्दरता समे बढ्ने स्थानीको भनाई छ । उपमहानगरपालिकाले विराटनगर लाइनमा रहेको सरोज चौधरीले बनाएको एकतले पक्की भवनमा डोजर चलाएर अभियानको शुरुवात गरेको बताइएको छ । पटक पटक सूचना जारी गर्दा पनि घरधनी तथा व्यापारी व्यवसायीहरुले अटेर गर्दै आएपछि शुक्रबार अचानक डोजर चल्न थालेपछि केही समय विवाद भएको थियो ।

इटहरीका राजनीतिक दल, प्रहरी प्रशासन लगायत सर्वपक्षीय छलफल गरेर राजमार्ग क्षेत्रमा पर्ने घरहरु हटाउने निर्णय स्वरुप शुक्रबारबाट अभियान थालिएको जनाइएको छ । सडक परियोजना अन्तर्गत ५५ फुट कायम हुने गरी शुक्रबारदेखि शुरु गरेर यसलाई निरन्तर काम शुरु हुने पनि उपमहानगरले जनाएको छ ।