लिम्बुवान किराँत प्रदेशको माग गर्दै प्रदर्शन

धरान । पहिचानको मुद्धालाई अगाडि सार्दै आएका ३२ संगठनले विहीबार प्रदेश १ को नाम लिम्बुवान किराँत हुनुपर्ने माग राख्दै विराटनगरमा प्रदर्शन गरेका छन् ।

उनीहरुले विराटनगरस्थित मुख्यमन्त्री कार्यालय अगाडि प्रदर्शन गरेका हुन् ।

‘पहिचान बिनाको प्रदेश मान्दैनौं’, ‘पहिचानवादीहरू एक हौं’ लगायत नारासहितका प्ले कार्ड लिएर संगठनहरूले प्रदर्शन गरेका थिए ।

प्रदर्शन पछि उनीहरुले मुख्यमन्त्री राजेन्द्रकुमार राईलाई ज्ञापन पत्र बुझाएका छन् । ज्ञापनपत्र बुझाउदै संघर्ष समितिका संयोजक प्रेम याक्थुङले प्रदेश नं. १ को नामाकरण पहिचानको आधारमा लिम्बुवान किरात नै उपयुक्त हुने भन्दै मुख्यमन्त्रीलाई ध्यानाकर्षण गरा । उनले भने–‘प्रदेश नं. १ को नामाकरण पहिचानको आधारमा हुनुपर्छ, पहिचानको आधारमा नाम राख्दा लिम्बुवान, किराँत उपयुक्त हुन्छ, यो बाहेक अर्को नाम पहिचानवादीलाई मान्य हुदैन ।’

उनले प्रदेशको नाममा लिम्बुवान किरात नजोडिए ८ प्रदेशको माग गर्दै फरक तरिकाले आन्दोलन गर्ने चेतावनी दिए । उनले भने–‘पहिचानवादी एक भएर आन्दोलन गर्दै आएका छौै, प्रदेश सरकार यसतर्फ सकारात्म बन्ने हामीले अपेक्षा लिएका छौं ।

ज्ञापनपत्र बुझ्दै मुख्यमन्त्री राजेन्द्र राईले आफू पहिचानको पक्षधर भएकोले पहिचानको आधारमा प्रदेश १ को नामाकरणमा आफू सकारात्मक भएको बताए । उनले भने ‘आफू पनि पहिचान पक्षधर हुँ, पहिचान विरोध नाम आउने अवस्थाको कदम म चाल्दिनँ ।’ मन्त्री राईले भने ‘खराब नाम आउनु भन्दा नआउदा नआउदा नै राम्रो हुन्छ ।’