_1693980289.gif "#")
धरान । नेकपा एमालेका अध्यक्ष केपी शर्मा ओलीले प्रदेश नं १ को नाम कोशी राख्दा सबैको लागि उपयुक्त हुने सुझाव दिएका छन् ।
प्रेस चौतारी नेपाल प्रदेश नं १ को प्रथम अधिवेशनलाई सम्बोधन गर्दै उनले कोशी प्रदेश राख्दा कसैलाई असर नगर्ने बताए । उनले भने –‘मानव सभ्यताभन्दा अघिदेखि नै कोशी नदीको उत्पत्ति भएका कारण प्रदेश नं १ को नाम ‘कोसी प्रदेश’ राख्दा उपयुक्त हुन्छ जस्तो मलाई लाग्छ ।’
उनले ‘कोशीले पुरानो सभ्यता र परम्परा बोकेको बताए । उनले भने–‘कोशी नदीमा यहाँका धर्म, ज्ञान, संस्कृति, सभ्यता र परम्परा जोडिएको छ, जातजाति भन्दा अगाडि कोशीको उत्पति भएको हो, त्यसैले कोशी प्रदेश हुँदा कसैलाई आपत्ति नहुनुपर्ने हो ।’
जातीय पहिचानको आधारभन्दा सभ्यताको पहिचान नै उपयुक्त र साझा हुने भएकोले कुनै भ्रममा नपरी प्रदेशको नामाकरण कोशी राख्दा हुने उनको तर्क छ ।
उनले अर्को प्रसङ्गमा नेपाली कांग्रेस एमालेसँग लड्ने पाँच घटकमध्ये एक भएको टिप्पणी गरे । वर्तमान गठबन्धनमध्येका कसैले पनि आउँदो निर्वाचनमा एमालेसँग एक्लै मैदानमा आउने आँट नगरेको उल्लेख गर्दै अध्यक्ष ओलीले लोकतन्त्रका निम्ति लामो सघर्ष गरेको कांग्रेसले दक्षिणपन्थीको वैशाखी टेक्नु दुःखद् भएको आरोप लगाए ।
प्रेस चौतारीको अधिवेशनलाई उद्घाटन गर्नुअघि पूर्वप्रधानमन्त्री समेत रहेका अध्यक्ष ओलीले अर्जुनधारा नगरपालिकास्थित सालबाडीमा रहेका पाँच शहीद रामनाथ दाहाल, नेत्र घिमिरे, वीरेन राजवंशी, कृष्ण कुईंकेल, नारायण श्रेष्ठको सालिकमा माल्यार्पणसमेत गरेका थिए भने उनले शनिवार नै झापा गोल्डकपको उद्घाटन गरेका थिए ।
