सामाजिक स्वास्थ्य क्लिनिकमा स्वास्थ्य परामर्श

धरान । परिवर्तनका लागि सामाजिक अभियानको ‘सामाजिक स्वास्थ्य क्लिनिक’ को नवौं संस्करण सम्पन्न गरिएको छ ।

धरान मोडल कलेजको प्राङ्गणमा शनिबार सम्पन्न पाक्षिक स्वास्थ्य क्लिनिकमा फलोअप र नयाँ गरी १६ जनाले स्वास्थ्य जाँच गरेका थिए । बीपी कोइराला स्वास्थ्य विज्ञान प्रतिष्ठानका मुटु रोग विशेषज्ञ डा. प्रशान्त साहसँगको सहकार्यमा हुँदै आइरहेको छ । डा. साहले क्लिनिकमा सहभागी बिरामीहरूको स्वास्थ्य जाँच गर्दै भने, ‘सबैभन्दा बढी खानपानलाई ध्यान दिनुहोला । खानपानका कारणले नै रोगहरूले आक्रमण गर्ने हुँदा यसतर्फ ध्यान दिनुस् ।’

क्लिनिकमा नयाँ बिरामीहरू पनि आउने गरेको अभियानका संयोजक विष्णु बरालले जानकारी दिए । उनका अनुसार फलोअप र नयाँ बिरामीहरूको स्वास्थ्य जाँच गरिसके पश्चात् डा. साहले परामर्श पनि गरेका थिए । स्वास्थ्य परामर्शले बिरामीलाई आफ्नो स्वास्थ्यको ख्याल गर्न सहयोग गर्ने गरेको उनले बताए ।

अभियानले विशेष गरी ७० वर्षभन्दा माथिका ज्येष्ठ नागरिकलाई लक्षित गर्दै क्लिनिक सञ्चालन गरेको हो । पाक्षिक रूपमा गर्दै आएको कार्यक्रम शनिबारका दिन गरिँदै आएको छ । धरान बाहेक विराटनगर, इटहरी लगायतबाट पनि क्लिनिकमा आउने गरेको सदस्य वर्षा अग्रवाल श्रेष्ठले बताइन् । उनका अनुसार अब भने धरानका वडा वडाहरूमा क्लिनिक सञ्चालन गर्ने योजना पनि बनाइएको छ । यसअन्तर्गत वडा वडाका ज्येष्ठ नागरिकलाई सेवा दिने उद्देश्य रहेको छ ।

क्लिनिकमा २० जनासम्म नयाँ बिरामीलाई जाँच गरिँदै आएको छ । त्यस्तै फलोअपमा रहेका अन्य बिरामीहरूलाई पनि जाँच गरिँदै आएको सदस्य त्रिभुवन बरालले जानकारी दिए । ‘नयाँ २० जनालाई पहिलो प्राथमिकता दिन्छौं, त्यसपछि फलोअपका त जाँच भइहाल्छ’ उनले भने । विशेष गरी बीपी प्रतिष्ठानमा ज्येष्ठ नागरिकहरूलाई लाइनमा लागेर जाँच गर्न गाह्रो हुने भएकाले पनि यस्तो कार्यक्रम तयार गरिएको संयोजक विष्णु बरालले जानकारी दिए ।