_1693980289.gif "#")
रंगेली/ सरकारले करोडौको वजेट बिनियोजन गरेर खोला कटान नियन्त्रणका लागी तारजाली सहितको तटवन्ध निर्माण गरे पनि स्थानीयले तारजाली काटेर बिक्रि गर्न थालेका छन् ।
स्थानीय सरकार सहित सरकारको सम्वन्धित कार्यालयले तटवन्धमा लगाइएको तारजाली काटेर विक्री गर्ने क्रम दिनप्रतिदिन बढिरहेको छ । कानोपोखरी, वेलवारी मिक्लाजुङ, लेटाङ, दर्वेशा, रंगेली लगायतका खोलामा लगाइएका तारजाली स्थानीयले काटेर कवाडीलाई विक्री बितरण गर्ने गरेको पाइएको छ । खोलामा आउने वाढीवाट गाउँ बस्ती जोगाउन तथा जग्गा कटान रोक्न सरकारले तारजाली ढुंगा सहितको तटवन्ध निर्माण गरिरहेको छ ।
पछिल्लो समयमा मोरङ जिल्लाको वक्राहा, चिसांङ, लोहन्द्रा, केशलिया, सिंगिया लगायत दर्जनौ खोलामा ठूलो वजेटमा तटवन्ध निर्माण भएका छन् । सरकारले तटवन्धमा गरेको लगानी गाउँ जोगाउन र खेतियोग्य जमिन वचाउन हो तर स्थानीय त्यही तारजाली काटेर बिक्रि गरिरहेका छन् ।
भारतवाट आएका कवाडीहरुले ३० रुपैया किलोमा तारजाली खरिद गर्ने गरेको पाइएको छ । साइकलमा आउने कवाडीहरुले प्रायजसो उत्तरी मोरङ क्षेत्रवाट वढी मात्रामा खरिद गरेर ल्याउने र रातीको समयमा रंगेली नाका भएर भारततर्फ लैजाने गरेका छन् । इलाका प्रहरी कार्यालय रंगेलीले तारजाली र साइकल सहित पहिलोपटक दुई जनालाई नियन्त्रणमा लिएर सजक गराएर छाडेको थियोे । पुनः प्रहरीले तीन जनाको साईकल समेत नियन्त्रणमा राखेको छ ।
साइकलमा तारजाली हालेर भारत लैजाने क्रममा उनीहरुलाई पक्राउ गरिएको प्रहरी निरिक्षक अनमोल खडकाले बताए । २४ घन्टा सुरक्षामा खटिए पनि खोलाको तटवन्धमा प्रयोग हुने तारजालीको चोरी निकासी नियन्त्रणमा भने प्रहरीको ध्यान जान सकेको छैन । तटवन्धमा प्रयोग भएका तारजाली चोरी गरी यसरी नै विक्री गर्दै जाने हो भने वर्षायाममा आउने वाढीले क्षति पु¥याउन सक्ने भएको छ ।
