सुन्तलाको कारोबारमा वृद्धि : कृषक लाभान्वित

धरान/ भोजपुरका सुन्तला कृषक मणिराम राई यस बर्ष सुन्तलाको उत्पादन बढेको र विगतको भन्दा बढी मूल्यमा विक्री गर्न पाउदा दंग छन् । विगतको बर्ष भन्दा उत्पादन बढी र मूल्य पनि सोचेभन्दा बढी पाउँदा उनी दंग भएका हुन् । उनी भन्छन्, ‘यस बर्ष बोटमा सुन्तला सोचेभन्दा बढी फल्यो, विक्री गर्दा पनि गत बर्षको भन्दा बढी मूल्य पाएको छु, यस बर्ष सुन्तला खेतिले धेरै फाइदा भएको छ ।’ उनका अनुसार गत बर्ष कृषि बजारमा थोक मूल्यमा सरदर एक सय रुपैया प्रतिकेजी विक्री भएको सुन्तला यस बर्ष १ सय २० रुपैया प्रतिकेजी विक्री भएको छ । उनले भने, ‘सुन्तलाको मूल्य बृद्धिसँगै उत्पादन पनि सोचेजस्तो भएपछि यस बर्ष ५ लाख भन्दा बढी आम्दानी गर्ने लक्ष्यमा छु, सोचेको लक्ष्य पुग्छ भन्ने मलाई लागेको छ ।

अघिल्लो बर्षको तुलनामा यस वर्ष कृषि बजारमा कृषकहरुले बढी सुन्तला ल्याएको व्यापारीहरु बताउँछन् । कृषि बजारका थोक विक्रेता टिकाराम श्रेष्ठले मंसिर र पुसको पहिलो हप्तामै सुन्तलाको कारोबार ह्वात्तै बढेको बताए । उनले भने, ‘हामीले कृषकबाट होलसेलमा प्रतिकेजी १ सय २० ले खरिद गरेका छौं, यही सुन्तला खुद्रामा व्यापारीले १ सय ५० रुपैयासम्म विक्री गर्ने गर्छन्् ।’ कार्तिक महिनादेखि चैत्र महिनासम्म कृषि बजारमा सुन्तला आउने गर्छन । सुन्तलाको मुख्य सिजन पौष र माघलाई मानिन्छ । कृषि उपज बजार स्थलका अनुसार गतको मंसिर सम्ममा मात्र कृषि बजारबाट १ हजार ५० मेट्रिक टन कारोबार भएको जनाएको छ । बजारका व्यवस्थापक लक्ष्मण भट्टराईले अघिल्लो वर्ष प्रतिकेजी १ सय रुपैयाको दरका हिसाबले मूल्यांकन गर्दा पनि औसत ११ करोड बराबरको सुन्तलाको कारोबार भएको बताए । उनी भन्छन्, ‘गत बर्षको तुलामा यही समयमा कृषि बजारबाट सुन्तलाको कारोबार बढी भएको पाइएको छ ।’

उनले यसबर्ष मंसिर मसान्त सम्म १ हजार २ सय ८० मेट्रिक टन कारोबार हँुदा १३ करोड मूल्य बराबरको सुन्तला विक्री भएको बताए । उनका अनुसार आर्थिक बर्ष २०७७÷७८ मा पूर्वी पहाडी जिल्लामा उत्पादन भएको सून्तला ५ हजार ८ सय ३९ मेट्रिक टन कारोबार भएको थियो । जसको औसत मूल्य ५८ करोड मूल्य बराबरको भएको छ । अहिले कृषि बजारमा सुन्तला दैनिक ३५देखि ५० मे.टन सम्म कारोबार भईरहेको उनको भनाई छ । उनले भने, ‘विक्री भएको सुन्तला अहिले धनकूटाको बूधूक, बोधे, खोकू भोजपूरबाट आईरहेको छ, ।

सिजन अझै बा“की रहेका कारण सुन्तला आउने क्रम जारी छ ।’ यस बर्ष पनि सिजनभरि गत बर्षकै हाराहारीमा कारोबार हुने अनुमान गरिएको बताए । उनका अनुसार यस बर्षको सिजनभरि कृषि बजारबाट ६ हजार ५ सय मेट्रिक टन अर्थात ७१ करोड बराबरको सुन्तला कारोबार हुने आकलन कृषि बजारले गरेको छ । कृषि बजारबाट सुन्तला पूूर्वकै ईटहरी, बिराटनगर, दमक, बिर्तामोड, राजबिराज, लाहान, जनकपुर लगायतका शहरहरुमा जाने गरेको व्यवस्थापक भट्टराई बताउँछन् । सुन्तला भारतीय बजारसम्म पुग्ने गरेको उनले बताए ।