बिजुलीको पोलमा कार ठोक्किँदा महिलाको मृत्यु

विराटनगर । मोरङको विराटनगरका कार दुर्घटनामा परी एक महिलाको मृत्यु भएको छ ।

बिहीबार विराटनगरतर्फ आउँदै गरेको बा ११ च १५७१ नम्बरको कार आफै अनियन्त्रित भई कोसी राजमार्गअन्तर्गत बुढीगङ्गा–३ मा दुर्घटनामा परेको हो ।

घटनामा बेलबारी नगरपालिका–१ की ३० वर्षीया चन्द्रकला राईको मृत्यु भएको जिल्ला प्रहरी कार्यालय मोरङका प्रवक्ता डिएसपी दीपक श्रेष्ठले जानकारी दिएका छन् ।

बेलबारीबाट विराटनगरतर्फ आउँदै गरेको कार सडकमा रहेको बिजुलीको पोलमा ठोक्किएको थियो । दुर्घटनामा कार चालक बेलबारी–१ का ३८ वर्षीय बाबुराम कार्की, बेलबारी–१ की ४३ वर्षीया गीता लिम्बू र ५५ वर्षीया सानी धिमाल घाइते भएका छन् । घाइते सबैको विराट मेडिकल कलेज बुढीगंगामा उपचार भइरहेको डिएसपी श्रेष्ठले बताए ।

प्रहरीका अनुसार मृतक चन्द्रकला र घाइते सानी मुटु सम्बन्धी पुरानै समस्याको चेकअपको लागि अस्पताल आईरहेका थिए । दुर्घटनामा कार पूर्ण रूपमा क्षतिग्रस्त छ ।