प्रदेश १ मा कोरोनाविरुद्धका चाइनिज खोप लगाउन शुरु

विराटनगर । प्रदेश १ का विभिन्न जिल्लासहित राजधानी विराटनगरमा चीन सरकारको अनुदानमा प्राप्त भेरोसेल खोप लगाउन शुरु गरिएको छ ।

मंगलबार र बुधबार दुई दिनसम्म खोप लगाइने विराटनगर महानगरपालिकाले जनाएको छ । मापदण्डमा परेका व्यक्तिहरुलाई महानगरभित्रका वडामा संचालित स्वास्थ्य संस्थाबाट खोप दिने प्रबन्ध मिलाइएको स्वास्थ्य महाशाखाले जनाएको छ ।
ज्येष्ठ नागरिकको हकमा वि. सं २०१६ साल जेठ २५ गते अगाडि नै जन्म भएको प्रमाणितप्रतिसहित खोप लगाउने केन्द्रमा आउनु पर्नेछ । नागरिकता, मतदाता परिचय पत्र र सरकारी कागजातलाई मान्यता दिइने बताइएको छ ।

जिल्लास्तरीय कोभिड खोप समन्वय समितिको निर्णय अनुसार भेरोसिल खोप अग्रपंक्तिमा खटिएका स्वास्थ्यकर्मी तथा चिकित्सक, चिकित्सा इन्टर्न विद्यार्थी, नर्स, पारामेडिक्स तथा जाँच, उपचार र हेरचाहमा खटिनेहरुलाई पनि दिइने छ । उनीहरुले सम्बन्धित संस्थाको परिचय पत्रका साथ सम्बन्धित संस्थाको सिफारिस अनिवार्य गरिएको छ ।

एक महिना अगाडि भेरोसेल खोप लगाएकाहरुले खोप कार्ड लिएर आए दोस्रो डोजन लगाउन पाउने महानगरको स्वास्थ्य महाशाखाले जनाएको छ । सामाजिक विकास मन्त्रालयका अनुसार प्रदेशका १४ जिल्लाका ७० हजार जनलाई खोप दिइने जनाएको छ ।