_1693980289.gif "#")
धरान । धरान ९ पुतली लाईन स्थित विजयपुर हस्पिटलमा २० बेडको कोभिड अस्पताल विहिबार देखि सञ्चालनमा ल्याउने भएको छ । दैनिक कोरोना संक्रमितको संख्या बढ्न थालेपछि विजयपुर हस्पिटलमा कोभिड अस्पताल बनाउने निर्णय गरिएको हो ।
देशका प्रत्येक अस्पतालहरुलाई २० बेडको कोभिड अस्पताल बनाउन नेपाल सरकारले निर्देशन दिएको थियो । सोही निर्देशन बमोजिम धरान उपमहानगरपालिकाले विजयपुर अस्पतालमा २० बेडको कोभिड अस्पताल सञ्चालनमा ल्याउनका लागि सामाजिक विकास मन्त्रालयमा सहयोग तथा समन्वय गरिदिने स्वास्थ्य महाशाखा प्रमुख उमेश मेहताले जानकारी दिए ।
अस्पताल सँग अनौपचारिक रुपमा धरान उपमहानगरपालिका बिच पटक पटक छलफल गरिएको थियो । मङ्गलबार धरान उपमहानगरपालिकामा २० बेडको कोभिड आइसोलेसन कक्ष सञ्चालनमा ल्याउनका लागि लिखित रुपमै निर्णय भएको मेहताले बताए । विजयपुर अस्पतालका सञ्चालक प्रभाव खतिवडाले कोभिड अस्पताल विहीबार (आज) देखि सञ्चालनमा ल्याउने जानकारी दिए ।
सञ्चालक खतिवडाले भने, ‘ अहिले १० बेडको पुर्ण तयारी भइसकेको छ, बिस्तारै २० बेडकै अस्पताल संचालन हुनेछ, अहिले धमाधम काम भईरहेको छ, कोरोना संक्रमित विरामीहरु पनि स्टेण्डबाई अवस्थामा छन्, सञ्चालनमा आउँछ ।’
