प्रदेश एकको तिन जिल्ला अति संवेदनशिल : सहजीकरणका लागि राजमार्गमा सेना

इटहरी । दोश्रो लहरको नयाँ भेरियन्ट सहितको कोरोना संक्रमणको दर काठमाण्डौ पछि प्रदेश एक दोश्रो जोखिमको रूपमा रहेपछि जारी गरिएको निषेधाज्ञालाइ जेठ १ गतेबाट कडाइका साथ लागु गरिएको छ ।

प्रदेश एकको तिन वटा जिल्लामा संक्रमण संगै मृत्युदर दोब्बर देखिएपछि सावधानी अपनाउदै तिन वटै जिल्लाका प्रसाशन कार्यालयहरूले निषेधाज्ञालाइ कडाइका साथ पालना गराउन मातहतका सुरक्षाकर्मीहरूलाइ निर्देशन दिएको छ ।

हालै बसेको प्रदेश एक सुरक्षा समितिले सुनसरी, मोरङ र झापामा कडाइका साथ निषेधाज्ञालाइ पालना गराउने निर्णय गर्दै निर्णयको कार्यान्वयन थालनी भएको सुनसरीका प्रमुख जिल्ला अधिकारी उमेश कुमार ढकालले बताए । प्रदेश एक आन्तरिक मामिला तथा कानुन मन्त्रालयको आयोजनामा बसेको सुरक्षा समितिको बैठकमा तिनवटै जिल्लाका प्रमुख जिल्ला अधिकारी, प्रहरी प्रमुख, सशस्त्र प्रहरी प्रमुख र नेपाली सेनाका मेजर, सहायक मेजर लगायतको उपस्थिति रहेको थियो ।

मुख्यतयः सुनसरीमा अट्टेरीपन बढेको र त्यस्लाइ तत्काल नियन्त्रण गर्न आक्रामक योजना सहित प्रशासन कठोर बनिने निर्णय भएको सुनसरीका प्रमुख जिल्ला अधिकारी ढकालले बताए । ढकालले अब पनि जो कोहीले निषेधाज्ञा आदेशलाई उल्लङ्घन गरेको पाइएमा संक्रामक रोग ऐन, २०२० अन्तर्गत भए गरेको कसुरमा १ महिना सम्म कैद वा १ सय रुपैयाँसम्म जरिबाना वा दुवै सजाय हुने बताए । ऐन अन्तर्गत काममा बाधा पु¥याउनेलाई ६ महिनासम्म कैद वा ६ सय सम्म जरिबाना वा दुवै सजाय हुने जनाइएको छ ।

सुरक्षा संयन्त्रमा नेपाली सेनाले समेत सहजिकरण गरेको जनाइएको छ । सुनसरीमा यस अघिनै ३१ गतेबाट कडाइका साथ निषेधाज्ञा पालना गराउने निर्णय बमोजिम स्थानीयस्तरमा नेपाली सेनाले पनि सघाउ पुर्याउने बताइएको छ । सुनसरीको धरान, इटहरी र इनरूवामा नेपाली सेनाले शनिबार बिहानै देखि कोरोना संक्रमणबारे स्थानीयहरूलाइ सचेत गराउँदै माइकिङ तथा सुरक्षा सतरकता अपनाउन आग्रह गर्दै आएको छ ।

सेना स्वयम राजमार्गमा निस्केपछि प्रदेश एकका मुख्य जिल्लामा निषेधाज्ञा कडाइका साथ पालना भइरहेको पाइएको छ । मुख्य राजमार्गमा सन्नाटा छाएको देखिएको छ भने बिनाकाम हिडडुल गर्ने स्थानीयहरूलाइ प्रहरीले बाटोबाटै फर्काउने गरेको छ ।