इटहरीमा दिनहुँ आन्दोलन

इटहरी/ लोकमार्ग सुधारका उपायहरू अविलम्ब लागू गराउन पटक–पटक पहल गर्दा पनि सरोकारवालाहरूले चासो नराखेपछि निर्माणाधीन रानी–इटहरी–धरान ६ लेन सडकअन्तर्गत यहाँ स्थानीय व्यवसायीहरूले दिनहुँ आनदोलन गर्न थालेका छन् ।

निर्माणको पहिलो चरणदेखि नै यो सडकमा विवाद आएको थियो । अहिले इटहरीको धरान लाइनमा निर्माणले निरन्तरता पाएको छ भने विराटनगर लाइनमा निर्माण अवरूद्ध छ । निर्माण कार्य समयमै पूरा नहुँदा धुँवा र धूलोबाट पीडित बनिरहेको भन्दै स्थानीयले दैनिक आन्दोलन गरेका हुन् ।

धुँवा र धूलोको कारण स्थानीयको स्वास्थ्यमा नकारात्मक असर पर्नुका साथै व्यवसायीहरू प्रत्यक्ष मर्कामा परेको भन्दै विराटनगर लाइनमा अहिले दैनिकजसो दुई घण्टासम्म चक्काजाम हुने गरेको छ ।

स्थानीय सरकारले पनि नियमित पानी नहालेको भन्दै उनीहरू आन्दोलित भएका हुन् । धूलोका कारण आफूहरू समस्यामा परेको कुरा सरोकारवालाहरूलाई सुनाउँदा पनि चासो नदेखाएपछि बाध्य भएर सडक नै अवरूद्ध बनाउनुपरेको स्थानीय व्यवसायी ध्रुव अधिकारी बताउँछन् । स्थानीय सरकार र सडक परियोजना कार्यालयले बेवास्ता गरेका कारण सडकमा आउनुपरेको उनले बताए ।

समयमै निर्माण कार्य नसके तथा आप्mना मागहरूप्रति गम्भीर नभए अझ कडा आन्दोलन गर्ने चेतावनी व्यवसायीहरूले दिने गरेका छन् । सडक परियोजनाको इटहरी कार्यालयले भने स्थानीयकै अवरोधका कारण विराटनगर लाइनमा एकापट्टि मात्रै सडक निर्माण भइरहेको बताएको छ । सडक क्षेत्रका संरचना तथा भवनहरू भत्काउँदा उचित मुआब्जा दिनुपर्ने उच्च अदालतको फैसलापछि विराटनगर लाइनमा अहिले पनि एकपट्टि मात्रै सडक निर्माण भइरहेको सो परियोजनाले जनाएको छ ।