मोडर्न प्रिप्रेटरीमा शहीद सप्ताह

इटहरी÷ शहीदहरूको सम्झनामा हरेक वर्ष माघ १० देखि १६ गतेसम्म मनाइने शहीद सप्ताह यहाँस्थित मोडर्न प्रिप्रेटरी स्कुलले सदाझैं यस वर्ष पनि मनाइरहेको छ ।

इटहरी–६ को मोडर्न प्रिप्रेटरीले विद्यार्थीहरूको सहभागितामा साताव्यापी शहीद सप्ताह मनाइरहेको जनाएको छ ।

देश र जनताका लागि जीवन बलिदान दिने शहीदहरूको सम्झनामा शहीद शुक्रराज शास्त्रीले शहादत प्राप्त गरेको दिन माघ १० गतेबाट विभिन्न कार्यक्रम आयोजना गरेको विद्यालयका सञ्चालक महेश दाहालले जानकारी दिए ।

यस्ता कार्यक्रमले विद्यार्थीहरूमा राष्ट्रियता र लोकतन्त्रप्रति प्रतिबद्ध हुने भावना विकास गर्न मद्दत गर्ने भएकाले कार्यक्रम गरिएको विद्यालयका सामाजिक विषयका शिक्षक प्रकाश प्याकुरेल बताउँछन् । विद्यालयले शहीदहरूको त्याग र समर्पणका विषयमा छलफल गर्ने, कविता वाचन, खुला हाजिरीजवाफ प्रतियोगिताजस्ता कार्यक्रम आयोजना गरिरहेको प्रिन्सिपल मणिकुमार पौडेलले बताए ।

पौडेलका अनुसार १६ गते शहीद दिवसका दिन विशेष कार्यक्रम आयोजना गरिनेछ ।