भारतबाट विराटनगरतर्फ घुँगी तस्करी

विराटनगर । भारतबाट विराटनगरतर्फ घुँगी तस्करी हुने गरेको पाइएको छ ।

सशस्त्र प्रहरीले भारतबाट नेपालतर्फ ल्याउँदै गरेको ठूलो परिमाणमा घुँगी बरामद गरेको हो । सशस्त्र प्रहरी बोर्डर आउट पोस्ट बखरीले सोमबार ३ सय केजी घुँगी बरामद गरेको छ ।

सशस्त्र प्रहरी बल बिओपी बखरीका सशस्त्र प्रहरी निरीक्षक दिलकुमार पन्तको नेतृत्वमा खटिएको टोलीले विराटनगर महानगरपालिका वडा नम्बर १६ दरैया सीमानाकामा घुँगी बरामद गरेको हो । दशगजा हुँदै नेपाल ल्याउन खोज्दा बरामद गरेको सशस्त्र प्रहरी निरीक्षक पन्तले बताए ।

प्रहरीलाई देखेपछि बोरामा ल्याउँदे गरेको घुँगी छोडेर तस्कर फरार भएका थिए । बरामद भएको ६ बोरा घुँगी प्रहरीले खाल्डो खनेर पुरेको छ । घुँगीमा पौष्टिक पदार्थ अधिक पाइने भएकोले आदिवासी समुदायमा लोकप्रिय छ ।