धनकुटा ÷धनकुटाको महालक्ष्मी नगरपालिकाकी उपप्रमुख मञ्जु कुमारी कार्की अधिकारीलाई कोरोना संक्रमण देखिएको छ ।
विपी कोइराला स्वास्थ्य विज्ञान प्रतिष्ठान धरानमा कात्तिक १९ गते गरिएको (पिसिआर) स्वाब परिक्षण गर्दा उनमा कोरोना संक्रमण पुष्टि भएको हो । उनको परिवारको एक सदस्यमा कोरोना संक्रमण देखिएपछि उनले बुधवार धरानमा पिसिआर परिक्षण गरेकी थिईन् । पिसिआर परिक्षणको आज विहान आएको रिर्पोट कोरोना पोजेटिभ आएको उनले बताईन् ।
कोरोना संक्रमण देखिएसँगै धनकुटा नगरपालिका–७ आफै घरमा होम आइसोलेशनमा बसेकी उपप्रमुख अधिकारीलाई सामान्य ज्वरो, घाँटी दुख्ने र छाती दुख्ने समस्या रहेको छ । केही दिन यता स्वाद र गन्ध थाहा हुन छाडेको पनि उनले बताईन् । उनमा कोरोना पोजेटिभ भएसँगै हालसालै आफ्नो सम्पर्कमा रहेकाहरुलाई सजग र सतर्क रहन सामाजिक सञ्जाल मार्फत आग्रह समेत गरेकी छिन् ।
यो सँगै धनकुटामा कोरोना संक्रमितको संख्या ७९ जना पुगेको छ । जसमध्ये ६५ जनाले कोरोनालाई पराजित गरेर घर फर्किसकेका छन् भने दुई जनाको निधन भएको छ । त्यस्तै १२ जना आईसोलेसनमा रहेको स्वास्थ्य कार्यालय धनकुटाका प्रमुख तुलसी गुरागाँईले बताए ।
