विराटनगरमा बुधवार तीन जना कोरोना संक्रमितको मृत्यु

विराटनगर । विराटनगरको अस्पतालमा बुधवार तीन जना कोरोना संक्रमितको मृत्यु भएको छ । कोसी अस्पताल कोभिड-१९ उपचार केन्द्रमा दुई र नोबेल अस्पतालमा एकको मृत्यु भएको हो । सुनसरीको इटहरी उपमहानगरपालिका-५ का ७३ वर्षीय वृद्धको कोभिड अस्पतालमा‌ अपरान्ह १२ः३५ बजे मृत्यु भएको हो । उपचार केन्द्रका प्रमुख डा.दीपक सिग्देलका अनुसार वृद्धमा श्वासप्रश्वासमा समस्या बढेपछि आजै ११ बजेतिर अस्पताल भर्ना गरिएको थियो । वृद्धलाई तत्काल आइसोलेसनमा भर्ना गरेर उपचार थालिएको मृत्यु भएको हो । वृद्धमा स्वास्थ्यसम्बन्धी अरु पुरानो समस्या नदेखिएको परिवारले जानकारी दिएको अस्पतालले जनाएको छ । बुधबार बिहान कोसीमै मोरङको जहदा गाउँपालिका-६ का ६० वर्षीय संक्रमित पुरुषको मृत्यु भएको थियो । यस्तै विराटनगरस्थित नोबेल मेडिकल कलेजमा सुनसरीको हरिनगर-२ का ५० वर्षीय संक्रमित पुरुषको पनि बुधबार बिहान ७ः३० बजेतिर मृत्यु भएको अस्पतालले जनाएको छ । प्रदेश १ मा कोरोना संक्रमणबाट मृत्यु हुनेको संख्या ७१ पुगेको छ ।