विराटनगर । कोरोना संक्रमितको संख्या दैनिक बढे सँगै मोबाइल भ्यानद्वारा कोरोना जाँचको स्वाब संकलन गर्न शुरु गरेको विराटनगर महानगरपालिकाले अशक्त व्यक्तीको घर–घर पुगेर स्वाब संकलन गरेको छ ।
शनिबार देखि अशक्तको घरमै पुगेर स्वाब संकलन कार्य शुरु गरेको हो । संक्रमितको सँख्या बढ्न थाले पछि अधिक संख्यामा नमुना संकलन गर्न गत मंगलबार देखि मोबाइल भेन शुरु गरेको थियो । स्थानीय स्रोत साधन प्रयोगबाट अत्याधुनिक र सुविधा सम्पन्न मोबाइल स्वाब भेनद्वारा घर घरमै स्वाब संकलन गर्न थालेको हो ।
विराटनगर महानगरपालिकाका अनुसार शनिबार विराटनगरका तीनवटा वडाका १८ जनाको घरघरमा पुगेको स्वाब संकलन भएको छ । मेयर भीम पराजुली सहित पुगेको टोलीले विराटनगर–४, ५ र ११ नम्बर वडाबाट अशक्तको स्वाब संकलन गरी परीक्षणका लागि प्रदेश जनस्वास्थ्य प्रयोगशालामा पठाएको स्वास्थ्य महाशाखा प्रमुख रमेश कार्कीले बताए ।
विराटनगर महानगरपालिकाले विराटनगरको जैन भवनमा स्वाब संकलन बुथ सञ्चालन गरिरहेको छ । स्वाब संकलन बुथसम्म आउन नसक्नेहरूको घरमै पुगेर स्वाब संकलन गरिने कार्कीले बताए । एकै स्थानमा स्वाब संकलन गर्दा भिडभाड हुने भएकाले स्वाब भेनबाट घर घरमै पुगेर स्वाब संकलन गर्दा सहज भएको नगरप्रमुख भीम पराजुलीले बताए ।
