देशभर कोरोनाबाट मृत्यु हुनेको संख्या २ सय ५ पुग्यो

 सुनसरी । समुदाय स्तरमै कोरोना संक्रमण बढ्दै गए पछि मृत्यु हुनेको संख्या पनि दिन प्रतिदिन बढ्दै गएको छ ।

शनिबार कोरोना भाइरसको संक्रमणबाट थप १० जनाको मृत्यु भए संगै देशभर कोरोनाबाट मृत्यु हुनेको संख्या २ सय ५ पुगेको छ । शनिबार पाटन अस्पतालमा उपचार गराई रहेका काठमाडौं र भक्तपुरका दुईजनाको ज्यान गएको छ ।

काठमाडौंकी ५१ र भक्तपुरकी ६२ वर्षीया महिलाको मृत्यु भएको हो ।

कोरोना भाइरसको संक्रमणबाट चितवन मेडिकल कलेजमा दुई जनाको मृत्यु भएको छ ।

आइसियुमा उपचार गराईरहेकी मकवानपुरकी ४९ वर्षिया एक महिला र बाराकी ४७ वर्षिया महिलाको मृत्यु भएको हो ।

त्यस्तै पर्साको वीरगञ्जमा थप तीनजनाको मृत्यु भएको छ ।

वीरगञ्ज हेल्थ केयर अस्पतालका अनुसार ६५ वर्षीया महिलाको नारायणी अस्पतालमा, ४३ वर्षीय पुरुष र ३७ वर्षीय पुरुषको वीरगञ्ज हेल्थ केयरमा उपचारका क्रमा मृत्यु भएको छ ।

त्यस्तै वीपी कोइराला स्वास्थ्य विज्ञान प्रतिष्ठान धरानमा सिरहाका ८४ वर्षीय वृद्धको मृत्यु भएको छ । पाल्पामा पनि एक महिलाको मृत्यु भएको छ ।

लुम्बिनी मेडिकल कलेजमा उपचाररत तानसेनकी ३० वर्षीया महिलाको मृत्यु भएको हो । कास्कीको पोखरामा पनि थप एकजनाको मृत्यु भएको छ ।

पोखरा महानगरपालिकाका ५८ वर्षीय पुरुषको उपचारका क्रममा पोखरा स्वास्थ्य विज्ञान प्रतिष्ठानमा मृत्यु भएको हो ।