धनकुटाको शहिदभूमि गाउँपालिकामा टमाटर खेती

धनकुटा, ७ भदौ / कोरोना भाइरसको महामारीका बाबजुद पनि धनकुटाको शहिदभूमि गाउँपालिकाबाट गत वर्ष ७२ मेट्रिक टन टमाटर बाहिर निर्यात भएको छ ।

कृषकहरुले सामाजिक दुरी कायम गर्दै यस वर्ष सो गाउँपालिकाको ३ सय हेक्टर जमिनमा टमाटर खेती गरेका थिए । यो सिजनमा गाउँपालिकाबाट ७२ मेट्रिक टन टमाटर बाहिर निर्यात भएको कृषि प्राविधिक खीरप्रसाद राईले बताए । गत वर्ष सहिदभूमि गाउँपालिकाबाट २० करोड रुपैयाँ बराबरको टमाटर बाहिरी जिल्लामा निर्यात भएको थियो । ।

यस वर्ष पनि टमाटर खेतीबाट गत वर्षकै हाराहारीमा कृषकहरुले आम्दानी गर्ने अपेक्षा लिएको सहिदभूमि गाउँपालिकाका अध्यक्ष मनोज राईले बताए । टमाटरको सिजनमा सहिदभूमि गाउँपालिकाबाट दैनिक १० देखि १२ ट्रयाक्टर टमाटर निर्यात हुदै आएको छ ।

कोरोना भाइरसको संक्रमणबाट बच्न लगाइएको लकडाउन र निषेधज्ञाको समयमा केही असहजता भएपनि तरकारीजन्य वस्तुको निर्यातमा कुनै रोकतोक नभएका कारण किसानले सामाजिक दुरी कायम गर्दै आफुले उत्पादन गरेका कृषि उपज विक्री वितरण गरी रहेको गाउँपालिका अध्यक्ष राईले बताए । टमाटर विक्री गरेर आफुले वार्षिक ४ लाख रुपैयाँ आम्दानी गरेको स्थानीय कृषक नगेन्द्र राईले बताए । विगत ५÷६ वर्षदेखि व्यवसायिक रुपमा टमाटर खेती गर्दै आएका राईले ८ हजार किलो टमाटर विक्री गरेर ४ लाख बढी आम्दानी गरेको उनले खुशी हुदै बताए । उनले ५० रोपनी जग्गामा टमाटर खेती गरेका छन् ।

टमाटर कृषक राईका अनुसार हरेक वर्ष असार १५ देखि टमाटर टिप्न शुरु गरेर कार्तिक महिनासम्म टिप्न सकिन्छ । कृषकहरुबाट व्यापारीले प्रति केजी ५० रुपैयाँका दरले टमाटर खरिद गर्ने गर्दछन् । सो क्षेत्रमा उत्पादिन टमाटर हिलेबजार, धनकुटा बजार, मुलघाट हुदै तराईका विभिन्न ठूला बजारहरुमा निर्यात हुने गर्दछ । धनकुटाको सबैभन्दा बढी टमाटर खेती हुने स्थान धनकुटा नगरपालिका–९ को बेलहारा, गुठीटार र सहिदभूमि गाउँपालिकाका विभिन्न वडाहरु रहेका छन् ।