सहिदभूमि गाँउपालिका बाँझो जमिनको सदुपयोग गर्दै वृक्षरोपण

धनकुटा, ६ भदौ / धनकुटाको सहिदभूमि गाँउपालिकाले खाँली रहेको बाँझो जमिनको सदुपयोग गर्दै वृक्षरोपण गर्न शुरु गरेको छ ।

स्थानीय कृषकहरुको दिगो आयआर्जनमा वृद्धि गर्दै लैजाने उद्देश्यले गाउँपालिकाका खाँली रहेका बाँझो जमिनमा फलफूलको विरुवा वृक्षारोपण गरिएको हो । संयुक्त राष्ट्र संघ (यूएनडिपी), सहिदभूमि गाउँपालिका र पर्डेप नेपाल धनकुटाको संयुक्त पहलमा एभोकाडो र आँपको एक हजार विरुवा गाउँपालिकाका ३ सय ५० रोपनीमा वृक्षरोपण गरिएको हो ।

गाउँपालिकाको वडा नं. ६ थलथलेमा रहेको एक सय ५० रोपनी खाँली सार्वजनिक जमिनमा ५ सय बोट एभोकाडोको विरुवा रोपिएको छ । त्यसैगरी वडा नं. १ को गोपालपुर बिडीटोलको दुई सय रोपनी सार्वजनिक जमिनमा ५ सय बोट आँपको विरुवा रोपण गरिएको पर्डेप नेपाल धनकुटाका कार्यकारी निर्देशक मीनप्रसाद सुवेदीले बताए । उक्त विरुवा खरिद गर्दा ५ लाख ५० हजार खर्च भएको थियो ।

सहिदभूमि गाँउपालिकाको कार्यक्रम, संयुक्त राष्ट्र संघ (यूएनडिपी) को सहयोग तथा पर्डेप नेपालको समन्वयमा गाउँपालिकाको कुनै पनि बोटविरुवा नभएका खाँली जमिनहरु छनौट गरेर फलफूलका विरुवाहरु रोपण गरिएको सहिदभूमि गाउँपालिकाका अध्यक्ष मनोज राईले बताए । उनले भने–‘फलफुलको विरुवा रोपणले भिरालो भएको जमिनमा पहिरो जानबाट रोक्नुको साथै कृषकहरुको आयआर्जनमा पनि बृद्धि हुन सक्छ ।

त्यसैले यो कार्यक्रमलाई अगाडी बढाएका हौं ।’ यसका साथै अहिले विश्वमा जलवायू परिवर्तनका कारण वातावरणमा गम्भीर प्रभाव परिरहेकाले वातावरणलाई बृक्षरोपणले सन्तुलनमा राख्न पनि सहयोग पु¥याउँदछ–अध्यक्ष राईले भने ।

गाउँपालिकाले सार्वजनिक जमिनमा रोपिएको आँप र एभोकाडोको विरुवा संरक्षण तथा हुर्काउने बढाउने र आम्दानीको स्रोत बलियो बनाउनका निम्ति कृषकहरुलाई जिम्मा दिएको छ । यसबाट गरिब, विपन्न कृषकहरुलाई दिगो आयआर्जनका लागि नियमित आम्दानीको स्रोत पनि बन्न सक्दछ ।

दिगो शान्ति, समृद्ध र विकासको लागि आर्थिक रुपान्तरण आवश्यक रहेकाले यो अभियानलाई अगाडी बढाएको पनि अध्यक्ष राईले जोड दिए । सहिदभूमि गाँउपालिकामा सिंचाईबाट सिञ्चित बनाउन प्रदेश सरकार मार्फत सिंचाई कार्यक्रम पनि सञ्चालन भईरहेको प्रदेश नं. १ का सांसद निरन राईले बताए । यसले पनि बाँझो र सुख्खा क्षेत्रमा बृक्षरोपण गर्न सहयोग पुग्ने स्थानीय कृषक पदम भण्डारीले बताए ।