विराटनगर । प्रदेश १ को राजधानी विराटनगरसहित मोरङका चार स्थानीय तहमा निषेधाज्ञा जारी भएको छ ।
जिल्ला प्रशासन कार्यालय मोरङले शुक्रबार रातिदेखि जारी हुने गरी विराटनगर,रंगेली नगरपालिकाका चारवटा वडा, कटहरी गाउँपालिकाका पाँचवटा वडा र बुढीगंगा गाउँपालिकाका चारवटा वडामा निषेधाज्ञा जारी भएको जनाएको छ ।
निषेधाज्ञा आज राति १२ बजेबाट सुरु हुने जिल्ला प्रशासन कार्यालयले जनाएको छ । सहायक प्रमुख जिल्ला अधिकारी धुव्रबहाुदर खड्काले भने,“ भदौ १० रातिसम्मको लागि १२ निषेधाज्ञा जारी भएको हो ।” विराटनगरका १९ वटै वडा, कटहरी गाउँपालिकाको १,२,३,४, रंगेली नगरपालिकाका ४,५,६ र ७, बुढीगंगा गाउँपालिकाको १,२,३ र ४ नम्बर वडामा निषेधाज्ञा जारी गरेको हो ।
मोरङमा राति ९ बजेबाट हिँडडुल गर्न प्रतिबन्ध लगाइएको छ । कोरोना संक्रमण फैलिएर समुदायस्तरमा गएपछि स्थानीय तहले निषेधाज्ञा जारी गर्न माग गर्दै आएका थिए ।
सहायक प्रजिअ खड्काले निषेधाज्ञाको पालना गर्न सर्वसाधारणमा अपिल गरेका छन । नगरक्षेत्रमा खाद्यान्न, तरकारी, फलफूल, दूधडेरी जस्ता वस्तुका पसल बिहान ९ बजेपछि खोल्न रोक लगाइएको छ । प्रदेश १ मा मोरङमा सबैभन्दा धेरै संक्रमित फेला परेका छन् । संक्रमणको आँकडा हरेक दिन बढ्दो छ ।
