_1693980289.gif "#")
धरान । सरकारले रोक्का गरेको ६० वर्ष मुनिका एकल महिला र अपाङ्गता भत्ता पुनः नविकरण गर्न खुल्ला गरिदिएको छ ।
साउन १५ गते गृहमन्त्रालयको निर्णय अनुसार ६० वर्ष मुनिका एकल महिला तथा अति अशक्त अपाङ्गता भएकाहरुको नविकरण गर्न स्थानीय तहहरुमा सुचना जारी गरेको छ ।
सरकारले सामाजिक सुरक्षा कार्यक्रमलाई व्यवस्थित गर्ने भन्दै २०७५ असोजमा पारित सामाजिक सुरक्षा ऐन र त्यसलाई लागु गर्न २०७६ चैत्रमा पारित गरिएको सामाजिक सुरक्षा नियमावली विवादमा परे पछि नविकरण समेत रोक्का राखेको थियो । गृह मन्त्रालय अन्तर्गत रहेको राष्ट्रिय परिचयपत्र तथा पञ्जीकरण विभागले नयाँ व्यवस्था अनुसार मात्रै सामाजिक सुरक्षा भत्ता वितरण गर्न स्थानीय तहलाई पत्राचार गरे अनुसार स्थानीय तहहरुले नविकरण गर्न रोकेका थिए ।
साउन १६ गते गृह मन्त्रालयको राष्ट्रिय परिचयपत्र तथा पञ्जीकरण विभागका निर्देशक विष्णु लामिछानेद्वारा सुचना जारी गरिएको छ । सुचना अनुसार सामाजिक सुरक्षा भत्ता खाइपाई आएका ६० वर्ष उमेर नपुगेका एकल महिला तथा अति अशक्त अपाङगता भएका लाभग्राहीहरुको छुट्टै अभिलेख राखी नविकरण तथा नयाँ निवेदन दर्ता गराउन हुन अनुरोध गरिएको छ ।
