सुनसरी । लकडाउनका कारण परिक्षा नै स्थगित भएको माध्यमिक शिक्षा परिक्षाको नतिजा विद्यालयको आन्तरिक मुल्यांकनको आधारमा एक साता भित्र सार्वजनिक गर्ने राष्ट्रिय परीक्षा बोर्डले तयारी गरेको जनाएको छ ।
देशै भरीका विद्यालयहरुले आन्तरिक मुल्यांकनका विवरणहरु पठाईसकेको र सकंलन भएका हार्डकपी र सफ्टकपी रुजुको काम अघि बढिरहेकाले यसै साता भित्र नतिजा सार्वजनिक गर्ने तयारीमा रहेको बोर्डका परिक्षा नियन्त्रक रामराज खकुरेलले बताए ।
उनका अनुसार २५ वटा समुह बनाएर विहिबार देखिनै हार्डकपी र सफ्टकपी रुजुको काम भईरहेको छ ।
शिक्षा पत्रकार समूहको सोमबारको ‘शिक्षाबार भर्चुअल संवाद’मा परीक्षा नियन्त्रक खकुरेलले विगतमा देशभरका विवरण बोर्डमा ल्याएर मार्क लेजर तयार पार्दा केही प्राविधिक त्रुटि देखिने गरेकोमा यसपटक विद्यालय आफैंले लेजर तयार पारेकाले त्रुटि कम हुने अनुमान गरिएको बताए । एसइई मूल्यांकनका सन्दर्भमा विद्यालयहरू र इकाईहरूसमेत गम्भीर नदेखिँदा केही जिल्लामा समस्या देखिएको खकुरेलले बताए ।
सरकारले कोभिड–१९ का कारण परीक्षा लिन सक्ने स्थिति नभएपछि विद्यालयको आन्तरिक मूल्यांकनका आधारमा नतिजा प्रकाशन गर्ने निर्णय लिएको हो । यस वर्ष ४ लाख ८२ हजार २ सय १९ विद्यार्थी एसइई परीक्षामा सहभागी हुँदै थिए । कोभिड १९ को महामारीका कारण परीक्षा सुरू हुनु एक दिनअघि ५ चैतमा परीक्षा स्थगित गरिएको थियो ।
