बिराट शिक्षण अस्पतालका चिकित्सकको सम्पर्कमा रहेका ४ जनामा कोरोना संक्रमण पुष्टि

विराटनगर । गत साताको मंगलबार संक्रमण पुष्टि भएका बिराटनगरको एक अस्पतालका चिकित्सकको सम्पर्कमा आएका ४ जनामा कोरोना पोजिटिभ देखिएको छ ।

संक्रमित डाक्टरको सम्पर्कमा आएका ५८ जनाको स्वाब शुक्रबार संकलन गरिएको थियो । संक्रमण देखिएका चारै जना अस्पतालकै कर्मचारी रहेका छन् । पोजेटिभ देखिएका चारजना स्वास्थ्यकर्मी एवं स्टाफ नर्स हुन् । अरु ५४ जनाको पीसीआर रिर्पोट भने नेगेटिभ आएको छ ।

अस्पतालका कर्मचारीहरुले प्रदेश सरकार, स्थानीय सरकारलाई संक्रमण देखिएको स्थानमा कार्यरत सबै कर्मचारीको पीसीआर परीक्षण गर्नुपर्नेमा जोड दिएका छन् ।

अस्पतालमा करिब तीन सयको संख्यामा कर्मचारी कार्यरत रहेको रहेका छन् । पहिलोचरणको परीक्षणमा नेगेटिभ रिपोर्ट आएका एक कर्मचारीले अस्पताल सिल गरेसँगै सबैको परीक्षण गर्न आवश्यक रहेको बताए ।

संक्रमित चिकित्सक रहँदै आएको बुढीगंगा गाँउपालिकाको टंकीसिनुवारीमा अवस्थित विराट शिक्षण अस्पतालमा समेत पीसीआरको दायरा बढाउनु पर्ने जोड दिएका छन् ।

गएको मंगलबार अस्पतालका ६५ वर्षीय चिकित्सकमा पहिलोपटक संक्रमणको पुष्टि भएको थियो ।

संक्रमण थाहा पाएपछि ती चिकित्सक सम्पर्क बिहीन भएका थिए ।

एक रात बीपीमा भर्ना भएका उनी शनिबार काठमाडौँको शिक्षण अस्पतालमा भर्ना भएकाछन् । महानगरले विराटनगर अस्पतालमा आवतजावत रोक्ने गरि सीलबन्दी गरेको छ ।