भोजपुर । भारतका विभिन्न स्थानबाट घर फर्किएर भोजपुरको होल्डीङ एरियामा बसेका ५ जनामा कोरोना संक्रमण पुष्टि भएको छ ।
गत जेठ १३ गते भारतबाट सुनौली नाका हुँदै भोजपुर आएका षडानन्द नगरपालिका दिङलाका ५ जनामा कोरोना संक्रमण पुष्टि भएको हो ।
उनीरुल अरुण गाउँपालिका स्थित जरायोटारको होल्डिङ एरियामा बसेका थिए । संक्रमण पुष्टि भएकाहरु सबै पुरुषहरु रहेको भोजपुरका प्रहरी प्रमुख डिएसपी नर बहादुर मगरले जानकारी दिए ।
होल्डिङ एरियामा बसेका ४० जनाको स्वाब परिक्षण गरिएको थियो । यसअघि भोजपुरको हतुवागढी गाउँपालिका होम्ताङमा एकजनामा कोरोना संक्रमण पुष्टि भएको थियो ।
पाँचजना संक्रमित फेला परेसँगै जिल्लामा कूल संक्रमित ६ जना पुगेका छन् ।
