_1693980289.gif "#")
विश्वव्यापी महामारीको रुपमा फैलिएको कोरोना भाइरस (कोभिड–१९) को संक्रमणबाट रोक्नको लागि धनकुटाको चौबिसे गाउँपालिकालाई पाँच दिनको लागि सिल गरिएको छ ।
धनकुटामा स्वास्थ्यकर्मीलाई नै कोरोना भाइरसको संक्रमण भएको पुष्टि भएपछि कोरोना भाइरसको संक्रमण फैलन सक्ने आंशकामा संक्रमण रोक्नको लागि चौबिसे गाउँपालिकालाई सिल गरिएको हो ।
कोरोना भाइरस नियन्त्रणको लागि गठन गरिएको विपत व्यवस्थापन समिति चौबिसेको आज विहान सम्पन्न आकस्मिक बैठकले चौबिसे गाउँपालिकामा एम्बुलेन्स बाहेकका सबै खालका आवत जावतलाई जेठ ५ गतेदेखि ९ गतेसम्मलाई बन्द गरिएको गाउँपालिकाका अध्यक्ष खजिन्द्र राईले बताए ।
गाउँपालिकालाई सिल गरिएसँगै चारै तिरको नाकामा पनि चेकजाँच कडाई गरिएको छ ।सो गाउँपालिका अन्तरगत रहेका सरकारी कार्यालय, बैक तथा वित्तिय संस्था, हाटबजार, सबैखालका बजार पसल लगायत सार्वजनिक निर्माणका कार्यहरु पनि पाँच दिनको लागि बन्द गर्ने बैठकले निर्णय गरेको छ ।
यता नेपाल सरकारको नियमित कार्यक्रम अन्तरगत हरेक महिना बालिकाहरुको लागि संचालन हुदै आएको खोप सेवा कार्यक्रम पनि अर्को सुचना जारी नभएसम्मको लागि बन्द गरिएको छ ।
जिल्ला अस्पताल धनकुटामा कार्यरत महिला स्वास्थ्यकर्मीलाई जेठ ४ गते साँझ कोरोना भाइरसको संक्रमण पुष्टि भएपछि धनकुटा सदरमुकामको बजार क्षेत्र आज विहानदेखि नै सिल गरी सकिएको छ ।
