_1693980289.gif "#")
प्रदेश १ सरकारको पहलमा बुधबारसम्म जम्मा ११ हजार १ सय १३ जनामा कोरोना भए नभएको परीक्षण भएको छ । सरकारले परीक्षणलाई तीव्रता दिएको हो । धरान र विराटनगरका तीनवटा ल्याबमा पीसीआर विधिबाट परीक्षण गर्ने प्रबन्ध भएको छ ।
मुख्यमन्त्री तथा मन्त्रिपरिषद् कार्यालय मातहतको कोरोना सूचना डेस्कका अनुसार दू्रत परीक्षण (आरडीटी) र ल्याबमा गरिने परीक्षण (पिसिआर) दुबै विधिबाट कोरोना परीक्षण दायर र दरलाई तिव्रता दिइएको हो ।
परीक्षण गरिएका नमूनामा आरडिटीतर्फका ८ हजार ६ सय ४९ जनाको रिर्पोट नेगेटिभ आएको छ । यसैगरी पिसिआर विधिबाट परीक्षण गरिएका मध्ये जम्मा २ हजार ४ सय १५ जनाको रिर्पोट नेगेटिभ आएको छ ।
यता, प्रदेश सरकारले निर्माण गरेका क्वारेन्टाइन स्थलमा बस्नेको संख्या कूल ६ सय ४२ जना छ । आइसोलेसनमा स्वास्थ्यकर्मीको निगरानीमा ३ जना छन् । बुधबार १ जना डिस्चार्ज भएका छन् । होम क्वारेन्टाइनमा जम्मा ८ हजार २ सय १० जना बसिरहेको मुख्यमन्त्री तथा मन्त्रिपरिषद् कार्यालयले जनाएको छ ।
सरकारले खडा गरेको कोरोना जनसुरक्षा कोषण्मा बुधबारसम्म २९ करोड १० लाख ३६ हजार ४ सय २२ रुपैयाँ जम्मा भएको छ । खर्च निकासा कट्टा गरी जम्मा बाँकी हुन आउने रकम १४ करोड १ लाख ३६ हजार २ सय ७२ रुपैयाँ छ ।
