सुनसरी/ सुनसरीको कोशी गाउँपालिका–१ स्थित भन्सार कार्यालय अगाडिबाट लागूऔषध ब्राउन सुगरसहित दुई जना पक्राउ परेका छन्।
भारतबाट नेपालतर्फ पैदल आउँदै गरेका दुई जनालाई प्रहरीले शंका लागेर जाँच गर्दा शरीरका गोप्य भागमा लुकाएर ल्याएको ब्राउन सुगर फेला परेको हो।
कात्तिक १६ गते साँझ ५ः३० बजे जिल्ला प्रहरी कार्यालय सुनसरी, इलाका प्रहरी कार्यालय लौकही र कोशी प्रदेश प्रहरी कार्यालय केनाइन शाखा धरानबाट कुकुरसहित खटिएको संयुक्त प्रहरी टोलीले उनीहरूलाई नियन्त्रणमा लिएको हो।
प्रहरीका अनुसार पक्राउ पर्नेमा धनकुटाको साँगुरीगढी गाउँपालिका–६ का ३१ वर्षीय बद्री स्याङ्बो तामाङ र पाँचथरको याङवरक गाउँपालिका–१ की २१ वर्षीया निस्मा राई रहेका छन्।
शरीर जाँच गर्ने क्रममा निस्मा राईले गोप्य अंगभित्र लुकाएर ल्याएको ११ ग्राम १३ मिलिग्राम र बद्री स्याङ्बो तामाङले मलद्वारमा लुकाएर ल्याएको ६ सय ६० मिलिग्राम ब्राउन सुगर बरामद भएको प्रहरीले जनाएको छ।
बरामद लागूऔषधसहित दुवै जनालाई नियन्त्रणमा लिएर जिल्ला प्रहरी कार्यालय सुनसरीमा राखिएको छ। घटनाबारे थप अनुसन्धान भइरहेको प्रहरीले जनाएको छ।
