धनकुटा/ धनकुटाको मुलघाटबाट प्रहरीले लागुऔषधसहित दुई जनालाई पक्राउ गरेको छ।
धनकुटा नगरपालिका–९ मुलघाटस्थित प्रहरी चौकीबाट खटिएको प्रहरी टोलीले सोमबार राति सवारीसाधन जाँच गर्ने क्रममा इटहरीबाट तेह्रथुमतर्फ जाँदै गरेको प्रदेश १–०२–००१ ज ४५१९ नम्बरको विद्युतीय गाडीमा सवार दुई जनालाई शंका लागेर जाँच गरेको थियो।
जाँचका क्रममा उनीहरूको साथबाट खैरो हेरोइनजस्तो देखिने धुलो पदार्थ स–साना प्लास्टिकका २५ वटा पोकामा प्याक गरिएको अवस्थामा फेला परेको प्रहरीले जनाएको छ।
त्यसैगरी खुला अवस्थामा हरियो रङका ५० वटा क्याप्सुल र सुन्तला रङका ४५ वटा ट्याब्लेटसमेत बरामद गरिएको जिल्ला प्रहरी कार्यालय धनकुटाका सूचना अधिकारी प्रहरी नायब उपरीक्षक हेमन्त भण्डारी क्षेत्रीले जानकारी दिए।
बरामद खैरो धुलो पदार्थ प्लास्टिकबाहेक तौल गर्दा १ ग्राम २३० मिलिग्राम रहेको प्रहरीले जनाएको छ।
पक्राउ पर्नेमा भोजपुरको टेम्केमैयुङ गाउँपालिका–१ का २२ वर्षीय भोला राई र भोजपुर नगरपालिका–६ देउरालीका २४ वर्षीय प्रविन राई छन्।
दुवैलाई नियन्त्रणमा लिई जिल्ला प्रहरी कार्यालय धनकुटामा ल्याएर थप अनुसन्धान भइरहेको प्रहरीले जनाएको छ।
