धरान/ धरान १६ मा अवस्थित यूएन - नवोदय +२ की छात्रा सुम्निहाङमा राईले सुनसरी जिल्ला स्तरीय ‘१६ औं राष्ट्रपति रनिङ शिल्ड प्रतियोगिता’ अन्तर्गत भलिबल विधामा प्रथम स्थान हासिल गर्दै कलेजको नाम उच्च बनाएकी छन्।
पढाइसँगै खेलकुद क्षेत्रमा पनि उत्कृष्ट क्षमता प्रदर्शन गर्दै सुम्निहाङमा राईले जिल्लास्तरमै प्रथम स्थान हासिल गरेपछि यूएन कलेज नवोदय +२ परिवार गौरवान्वित बनेको छ।
क्याम्पस प्रमुख डम्बर कुमार तुम्बापोका अनुसार सुम्निहाङमाको यो सफलता मेहनत, अनुशासन र निरन्तर अभ्यासको प्रतिफल हो।
उनले सुम्निहाङमालाई हार्दिक बधाई दिँदै आगामी दिनमा जिल्ला हुँदै प्रदेश र राष्ट्रिय स्तरसम्म विजेता बन्न सफल होउन् भन्ने शुभकामना व्यक्त गरे।
“हाम्रा विद्यार्थीहरू अध्ययनसँगै खेलकुदमा पनि अब्बल बन्दै जानु गौरवको विषय हो,” उनले बताए।
सुम्निहाङमाको उपलब्धिले यूएन कलेज नवोदय +२ लाई थप उत्साहित बनाएको छ भने अन्य विद्यार्थीलाई पनि प्रेरणा दिएको कलेजले जनाएको छ।
