धरान/ धरान–१२ स्थित धरान मेघा हिमालयन कलेजले धरान प्लस टु स्तरीय वक्तृत्वकला प्रतियोगिताका विजेता तथा सहभागी विद्यार्थीलाई सम्मान गरेको छ।
र्याडिकल लाइट नेपाल प्रा।लि।द्वारा गत चैत्र २१ गते आयोजित प्रतियोगितामा कक्षा–११ की छात्रा सन्जिना राई प्रथम भएकी थिइन्। उनलाई कलेजले बिहीबार विशेष कार्यक्रम गरी सम्मान गरेको हो। साथै, सोही प्रतियोगितामा उत्साहजनक सहभागिता जनाएकी कक्षा–११ कै दिविका राईलाई पनि सम्मान गरिएको छ।
कलेजका प्रिन्सिपल भास्कर पौडेल, शैक्षिक निर्देशक अर्जुन घिमिरे तथा अध्यापक चन्द्र वनेमले छात्राद्वयलाई मायाको चिनो प्रदान गर्दै अबिर र खादा लगाएर सम्मान गरेका थिए।
कार्यक्रममा प्रिन्सिपल पौडेलले यस्ता प्रतियोगितामा सहभागिता जनाउँदै उत्कृष्टता हासिल गर्न विद्यार्थीलाई प्रेरणा मिलोस् भन्ने उद्देश्यले सम्मान गरिएको बताए। शैक्षिक निर्देशक घिमिरेले कलेजले अध्ययनसँगै अतिरिक्त क्रियाकलापमा पनि विद्यार्थीको क्षमता विकासमा जोड दिँदै आएको उल्लेख गरे।
सम्मानबाट आफूहरू थप उत्साहित भएको प्रतिक्रिया छात्राद्वयले दिएका छन्।
उक्त प्रतियोगितामा विजेता सन्जिना राईले नगद ७ हजार रुपैयाँसहित प्रमाणपत्र प्राप्त गरेकी थिइन् भने दिविका राईले सक्रिय सहभागिताका लागि प्रमाणपत्र हासिल गरेकी थिइन्।
