वराहक्षेत्र/ वाङ्गे बजारदेखि नडाहा हुँदै धरान जोड्ने बहुप्रतिक्षित कालोपत्रे सडक निर्माण लामो समयदेखि अलपत्र पर्दै आएपछि वराहक्षेत्र नगरपालिकाका मेयर रमेश कार्की कडा रूपमा अघि बढेका छन्।
सोमबार मेयर कार्की स्थानीय जनप्रतिनिधि तथा उपभोक्तासहित विराटनगरस्थित भौतिक पूर्वाधार तथा यातायात मन्त्रालय अन्तर्गतको सडक विभाग पुगेर विभागीय प्रमुख तथा सम्बन्धित अधिकारीहरूको ध्यानाकर्षण गराउँदै योजना यथाशीघ्र सम्पन्न गर्न कडा दबाब दिएका हुन्।
संघीय सरकारको बजेटबाट निर्माण भइरहेको उक्त सडक समयमै सम्पन्न नहुँदा स्थानीयवासी तथा सेवाग्राहीले निरन्तर सास्ती खेप्दै आएका छन्। धुलो, हिलो र अव्यवस्थित सडकका कारण दैनिक आवतजावतमा कठिनाइ बढेको स्थानीयको गुनासो छ।
मेयर कार्कीले यसअघि पनि पटक–पटक सम्बन्धित निकाय, विभागीय प्रमुख तथा निर्माण कम्पनीसँग समन्वय गर्दै आएका थिए। तर, विभागीय ढिलासुस्ती र निर्माण कम्पनीको कमजोर कार्यशैलीका कारण योजना निर्धारित समयमै पूरा हुन सकेको छैन।
निर्माणमा ढिलाइ हुनुका कारणमा राजनीतिक अवस्था परिवर्तन, निर्वाचन, प्रतिकूल मौसम तथा निर्माण सामग्रीको मूल्यवृद्धिलाई देखाइएको छ।
स्थानीयको समस्या झन् जटिल बन्दै गएको भन्दै मेयर कार्कीले अब आवश्यक परे काठमाडौंस्थित मन्त्रालयमै पुगेर थप दबाब दिने चेतावनी दिएका छन्।
