_1693980289.gif "#")
धरान/ सुनसरीको धरान उपमहानगरपालिका–१३ स्थित जिरोप्वाइन्टमा भएको बस दुर्घटनाले शोकमा डुबाएको छ।
भेडेटारबाट धरानतर्फ आउँदै गरेको शैक्षिक भ्रमणको बस अनियन्त्रित भई सडक छेउमा रहेको न्यू सभा मेडिकल मा ठोक्किँदा १८ महिनाको शिशुसहित ५ जनाको घटनास्थलमै मृत्यु भएको छ भने १२ जना घाइते भएका छन्।
प्रहरीका अनुसार मिति २०८२।१०।०४ गते दिउँसो ४ः१० बजे कोशी राजमार्ग अन्तर्गत जिरोप्वाइन्ट क्षेत्रमा को.१ ख ७११९ नम्बरको बस दुर्घटनामा परेको हो। उक्त बस टाइम्स इन्टरनेशनल एकेडेमी स्कुल, जनकपुर को शैक्षिक भ्रमणमा प्रयोग भएको खुलेको छ।
दुर्घटनामा बसमा सवार १३ जनामध्ये २ जना र मेडिकलमा रहेका ३ जना गरी जम्मा ५ जनाको ज्यान गएको प्रहरीले जनाएको छ।
मृतकको विवरण
महोत्तरी गैडादेवपुर–८ का रोहित कुमार मण्डलका १८ महिनाका छोरा रिसब कुमार मण्डल (बसमा सवार)
महोत्तरी गैडादेवपुर–८ का ३१ वर्षीय धैरिया कुमार यादव (बसमा सवार)
सुनसरी बराहक्षेत्र नगरपालिका–३ का २० वर्षीय ओमेश राई (मेडिकलमा रहेका)
झापा मेचीनगर नगरपालिका निवासी १९ वर्षीय नयन थापा मगर (मेडिकलमा रहेका)
धरान–१३ की २४ वर्षीया सुवेक्षा सुब्बा (न्यू सभा मेडिकल सञ्चालिका)
दुर्घटनामा घाइते भएका १२ जनालाई तत्काल उद्धार गरी बीपी कोइराला स्वास्थ्य विज्ञान प्रतिष्ठान, धरान (घोपा) मा उपचारका लागि पठाइएको छ।
प्रहरीका अनुसार बसमा सवार रिना मण्डल, जितेन्द्र मण्डल, चालक महमत मुलाल, सुनेना देवी मण्डल र कृष्ण मण्डल को अवस्था गम्भीर रहेको छ। अन्य घाइतेहरूको अवस्था मध्यमदेखि सामान्य रहेको बताइएको छ।
घटनाको जानकारी पाउनासाथ इलाका प्रहरी कार्यालय धरान र प्रदेश प्रहरी कार्यालय सुनसरी बाट खटिएको टोलीले उद्धार, अनुसन्धान र घटनास्थल नियन्त्रणको काम गरेको थियो।
दुर्घटनाको कारणबारे थप अनुसन्धान भइरहेको प्रहरीले जनाएको छ।
थप विवरण आउन बाँकी छ।
