धरान/ कोशी प्रदेशस्तरीय अन्तर विद्यालय डिआइजी रनिङ कप फुटबल प्रतियोगिताको सातौँ संस्करणमा प्रभात सेकेण्डरी बोर्डिङ स्कुल धरानले शानदार प्रदर्शन गर्दै फाइनलमा प्रवेश गरेको छ।
बिहीबार नेपाल प्रहरी प्रदेश कार्यालय धरानस्थित फुटबल मैदानमा भएको दोस्रो सेमिफाइनल खेलमा प्रभात स्कुलले पिनाकल ज्ञान मन्दिर कानेपोखरी, मोरङलाई ४–० ले पराजित गर्यो।
खेलको पहिलो हाफमा प्रभातका भुवन भण्डारीले सातौँ मिनेटमा गोल गर्दै अग्रता दिलाए। दोस्रो हाफमा पनि प्रभातको दबदबा कायम रह्यो। भुवन भण्डारीले १२ औँ मिनेटमा दोस्रो गोल गर्दा, निम्साङ मगरले २० औँ र २९ औँ मिनेटमा दुई गोल थप्दै टोलीको जित सुनिश्चित गरे।
पिनाकल स्कुलले गोल फर्काउने प्रयास गर्यो, तर प्रभातको सुदृढ डिफेन्सले सबै प्रयासलाई रोक्यो।
उत्कृष्ट प्रदर्शनका लागि भुवन भण्डारी ‘म्यान अफ द म्याच’ घोषित भए र नगद १ हजार ५ रुपैयाँ पुरस्कार पाए।
आयोजकका अनुसार प्रतियोगितामा कोशी प्रदेशका १६ विद्यालय सहभागी छन्। विजेताले ट्रफीसहित नगद ८१ हजार ५ रुपैयाँ र उपविजेताले ट्रफीसहित नगद ४१ हजार ५ रुपैयाँ प्राप्त गर्नेछन्।
शनिवार हुने फाइनल खेलमा नेपाल पुलिस स्कुल रेड र प्रभात सेकेण्डरी बोर्डिङ स्कुल धरानबीच प्रतिस्पर्धा हुने आयोजकले जानकारी दिएको छ।
