धरान/ धरान–१७ सचेत नागरिक समूहले यसपटक तिहारमा सांस्कृतिक देउसी खेलेर रकम सङ्कलन गर्ने भएको छ ।
देउसी कार्यक्रमबाट सङ्कलित सम्पूर्ण रकम जेन–जी आन्दोलन क्रममा ध्वस्त बनाइएका भौतिक संरचनाहरूको पुनर्निर्माणमा खर्च गरिने समूहले जनाएको छ ।
समूहले आइतबार पत्रकार सम्मेलनमार्पmत् यसबारे जानकारी दिएको हो । समूहले यही कात्तिक ५ गते रेल्वेचोकमा सांस्कृतिक देउसी कार्यक्रम आयोजना गर्ने भएको छ ।
देउसीबाट सङ्कलित रकम राष्ट्रिय वाणिज्य बैङ्कमा रहेको खाता नं.१९६०१००१०२०७०००४ (भौतिक पूर्वाधार पुनर्निर्माण कोष) मा जम्मा गरिने समूहका संयोजक दयाराम थापाले जनाए ।
समूहले २०८१ मा पनि बाढीपीडितहरूका लागि देउसी कार्यक्रमबाट सङ्कलित २ लाख ५ हजार रुपैयाँ सरकारी राहत कोषमा बुझाएको थियो । कोरोना महामारीको बेला पनि सो समूहले विपन्न समुदायलाई खाद्यान्न र लत्ताकपडा सहयोग गरेको थियो भने होल्डिङ सेन्टर र क्वारेनटाइनसमेत व्यवस्थापन गरेको थियो ।
यसपालिको देउसी कार्यक्रममा धरान–१७ वडा कार्यालयसँग सहकार्य रहने जानकारी दिँदै संयोजक थापाले सांस्कृतिक देउसी कार्यक्रममा सहभागी भई सामाजिक उत्तरदायित्वमा हातेमालो गर्न सम्पूर्ण धरानवासीलाई अनुरोध गरेका छन् ।
