धरान/ पाँचथरको कुम्मायक गाउँपालिका–१ मा बाँदर आतंक नियन्त्रण गर्न वडाले बाँदर हेरालु कर्मचारी खटाएको छ ।
कृषकको अन्नबाली जोगाउन तथा बाँदरको समस्या समाधानका लागि यसअघि विभिन्न उपाय अवलम्बन गरिए पनि समस्या झन् बढेपछि यो कदम चालिएको हो ।
वडाको बजेटबाट गाउँपालिकाका ९ वटै वडामा १/१ जनाका दरले ९ जना बाँदर हेरालु कर्मचारी नियुक्त गरिएको वडाध्यक्ष तथा गाउँपालिकाका प्रवक्ता देवेन्द्रकुमार लावतीले जानकारी दिए ।
उनका अनुसार गाउँबाट युवा जनशक्ति पलायन भइरहँदा थोरै बाँकी खेतबारीमा लगाइएको बालीसमेत बाँदरले सखाप बनाउने गरेको छ । जंगली जनावर विशेषगरी बाँदरले अन्नबाली सिध्याइदिने, घरआँगनमा पसेर हैरान बनाउने क्रम बढेपछि कृषकले यस्तो व्यवस्था गर्न माग गरेका थिए ।
वडाध्यक्ष लावतीका अनुसार वन्यजन्तुजन्य क्षति न्यूनीकरण, किसानको खेती सुरक्षित राख्न तथा मानव–वन्यजन्तु सहअस्तित्व प्रवर्धन गर्ने उद्देश्यले बाँदर हेरालु कर्मचारी खटाइएको हो ।
बढ्दो झाडी र खेतीयोग्य जमिन बाँझिँदै गएकाले बाँदरसँगै अन्य जंगली जनावरको आतंक बढेको छ । सोही कारण बसाइँ सर्नेको संख्या पनि दिनप्रतिदिन बढ्दो छ ।
