-साङ्केतिक तस्बिर
धरान/ सुनसरीको धरानमा तेजाब सेवन गरी गम्भीर घाइते भएका एक पुरुषको उपचारका क्रममा मृत्यु भएको छ।
धरान उपमहानगरपालिका–७ बगैँचा लाइनका अन्दाजी ४४ वर्षीय सरोज विकको आइतबार राति विराटनगरस्थित विराट नर्सिङ होममा निधन भएको हो।
सुनसरी प्रहरीका प्रवक्ता डीएसपी योगराज खतिवडाका अनुसार विकले गत असार २३ गते राति मादक पदार्थ सेवन (मापसे) गरेपछि घरमा धारा सफा गर्न राखिएको तेजाब सेवन गरेका थिए।
तेजाब सेवन गरेपछि उनको अवस्था गम्भीर बनेको थियो। तत्कालै उनलाई धरानस्थित बीपी कोइराला स्वास्थ्य विज्ञान प्रतिष्ठानमा भर्ना गरिएको थियो। त्यहाँ प्रारम्भिक उपचारपछि थप जटिल उपचार आवश्यक भएपछि उनलाई विराटनगर लगिएको थियो।
करीब दुई साता उपचारपछि आइतबार राति करिब १० बजे तिर उनको मृत्यु भएको प्रहरीले जानकारी दिएको छ।
