_1693980289.gif "#")
सुनसरी/ सुनसरी, मोरङ हुँदै पूर्वी पहाडी जिल्लाहरू जोड्ने मेची राजमार्ग पुनः अवरुद्ध भएको छ । निरन्तरको वर्षापछि आएको बाढीले पाँचथरस्थित हेवा खोलाको अस्थायी डाइभर्सन बगाउँदा राजमार्ग अवरुद्ध भएको हो ।
पाँचथरका प्रमुख जिल्ला अधिकारी अरुण पोखरेलले डाइभर्सनमाथिबाट बाढीको पानी बग्न थालेपछि यातायात ठप्प भएको जानकारी दिए । “पानीको बहाव अहिले केही घट्दै छ, घटेपछि मर्मत गरी सञ्चालनमा ल्याउने तयारी भइरहेको छ,” उनले बताए ।
मेची राजमार्ग अवरुद्ध भएपछि ताप्लेजुङ र पाँचथर जिल्लाका तीन पालिकामा सवारीसाधन सञ्चालन रोकिएको छ । यसले अत्यावश्यक सेवासमेत प्रभावित बनेको स्थानीय प्रशासनले जनाएको छ ।
हेवा खोलामा यो समस्या पहिलो पटक भने होइन । यसअघि २०८० असारमा आएको बाढीले सो खोलामा रहेको स्थायी पुल बगाएको थियो । त्यसपछि अस्थायी बेलिब्रिज बनाइएको थियो, तर त्यो पनि २०८० असोज १२ गतेको बाढीले बगायो । त्यसयता डाइभर्सनमार्फतै यातायात सञ्चालन हुँदै आएको थियो ।
पाँचथरको फिदिम नगरपालिका–४ र हिलिहाङ गाउँपालिका–७ जोड्ने सो क्षेत्रको नयाँ बेलिब्रिज जेठ ३१ गते निर्माण सकिएको घोषणा गरिएको दिनमै बगाएको थियो ।
यतिबेला केवल मेची राजमार्ग मात्र होइन, तमोर करिडोर पनि बाढी र पहिरोका कारण बन्द भएको छ । जिल्ला प्रहरी कार्यालय धनकुटाका अनुसार साँघुरीगढी गाउँपालिका–९ मा ठूलो पहिरो खस्दा सडक अबरुद्ध भएको हो ।
स्थानीय प्रशासन र सुरक्षाकर्मी परिचालन गरेर यातायात सुचारु गर्न प्रयास भइरहेको जानकारी दिइएको छ ।
