रामधुनी/ सुनसरीको रामधुनी नगरपालिका–७ स्थित क्वाटर डाँडामा प्रहरीले ३०० किलो लागूऔषध गाँजा बरामद गरेको छ।
आज (बिहीबार) दिउँसो विशेष सूचनाका आधारमा इलाका प्रहरी कार्यालय पकली तथा प्रहरी पोष्ट पंचायनको संयुक्त टोलीले बाँसको झ्याङ भित्र कालो प्लास्टिकमा प्याक गरिएको १० वटा पोका फेला पारेका हुन्।
ती पोकामा गाँजा बरामद गरिएको प्रहरीले जनाएको छ।
गाँजा बेवारिसे अवस्थामा लुकाइ राखिएको थियो। बरामद गरिएको लागूऔषध आवश्यक कारबाहीको लागि इलाका प्रहरी कार्यालय पकलीमा ल्याइएको र थप अनुसन्धान अघि बढाइएको प्रहरीले जानकारी दिएको छ।
