_1693980289.gif "#")
सुनसरी/ धरान उपमहानगरपालिका–२० मा अवस्थित चिन्डेडाँडा (रमितेडाँडा) पछिल्लो समय पूर्वी नेपालकै लोकप्रिय हाइकिङ गन्तव्य र पर्यटकीय स्थलका रूपमा चर्चित बन्दै गएको छ ।
गर्मीयाम सुरु भएसँगै यो क्षेत्रमा आन्तरिक पर्यटकको उल्लेखनीय चहलपहल देखिन थालेको छ ।
धरान, इटहरी, झापा, चितवन, काठमाडौँ लगायतका ठाउँबाट दैनिक सयौँ पर्यटक प्राकृतिक दृश्यावलोकन र घुमघामको लागि चिन्डेडाँडा पुग्ने गरेका छन् ।
धरान बजार, चारकोसे झाडी, तराईका समथर भू–भागदेखि आसपासका डाँडाकाँडाको रमणीय दृश्य हेर्न मिल्ने यो स्थानमा साथीभाइ वा परिवारसहित घुम्न आउनेको भीड लाग्ने गरेको छ ।
धरान–१६ का सुदीप श्रेष्ठ बेलायतबाट बिदामा घर फर्किएपछि चिन्डेडाँडा पुगे ।पहिला उजाड देखिने ठाउँ अहिले निकै आकर्षक र पर्यटकमैत्री बनेको देख्दा गर्व लाग्यो, उनले भने, “गर्मीमा दृश्य हेर्दै घुम्न रमाइलो हुन्छ ।”
इटहरीकी सुशीला राईका लागि भने यो पहिलो अनुभव थियो । “यहाँको वातावरण वर्णन गर्नै गाह्रो छ, गर्मीमा झन् रमाइलो,” उनले भनिन् ।
धरानबाट मोटरसाइकल वा गाडीमा १५–२० मिनेट र पैदल यात्रामा करिब १ घण्टा लाग्ने चिन्डेडाँडा हरेक उमेर समूहका लागि उपयुक्त गन्तव्य बन्दैछ ।
केही वर्षअघिसम्म प्याराग्लाइडिङका लागि चर्चित यस क्षेत्र अहिले होटल तथा खाजा घरहरूको विस्तारसँगै पूर्ण मनोरञ्जनस्थलको रूपमा विकास हुँदै गएको छ ।
स्थानीय होटल व्यवसायी लक्ष्मी तामाङका अनुसार गर्मीयाममा दैनिक करिब ३०० पर्यटक चिन्डेडाँडा पुग्ने गरेका छन् । “यहाँको लोकल कुखुराको मासु, तोङ्वा, सुकुटी, भट्टु–भातजस्ता परिकार पर्यटकको रोजाइमा छन्,” उनले भनिन् ।
अर्का व्यवसायी वसन्ती तामाङका अनुसार धेरैजसो पर्यटक छोटो घुमफिरका लागि आउने भए पनि केही बास बस्ने चलन पनि बढ्दो छ ।
हाल कच्ची सडक भएको र वर्षायाममा यात्रा केही कठिन हुने व्यवसायीको भनाइ छ । यद्यपि, सर्दु खोलामा बनेको पुलले यात्रा केही सहज बनाएको उनीहरू बताउँछन् ।
स्थानीय अनुसार, पहिला उत्तरतर्फ नाङ्गो देखिने भएकाले ुचिन्डेडाँडाु नाम रहन गएको हो भने यहाँ अडिएर रमिता हेर्नेहरूको कारणले रमितेडाँडाु पनि भन्ने गरिएको छ ।
तामाङ, गुरुङ, राई, क्षेत्री, ब्राह्मण लगायत समुदायको बसोबास रहेको यस क्षेत्रमा घरबास ९होमस्टे० पनि सञ्चालनमा छन् । भ्यू टावरको निर्माणसँगै पर्यटकको आकर्षण अझै बढेको छ ।
धरानका नगरप्रमुख हर्कराज साम्पाङको नेतृत्वमा किरात राई समुदायका देउता सुम्निमा–पारुहाङको प्रतिमा निर्माणको तयारी भइरहेको छ । स्थानीयको विश्वास छ—प्रतिमा स्थापना भएपछि चिन्डेडाँडाको पर्यटन विकासमा नयाँ उचाइ थपिनेछ ।
-रासस
