भारत–पाक तनाव: ‘सिन्दूर अपरेसन’मा ४४ को ज्यान गयाे

काठमाडौ/ दक्षिण एसियामा भारत र पाकिस्तानबीचको सैनिक तनाव फेरि उत्कर्षमा पुगेको छ। भारतले मे ७ को राति पाकिस्तानको सीमावर्ती क्षेत्रमा ‘सिन्दूर अपरेसन’ नाम दिइएको सैन्य कारबाही चलाएपछि दुवै देशमा गरी ४४ जनाको ज्यान गएको छ।

भारतले पाकिस्तान प्रशासित कश्मीर र पन्जाब प्रान्तमा रहेका आतंकवादी शिविरहरूलाई लक्षित गर्दै हवाई हमला गरेको जनाएको छ।

भारतीय रक्षा मन्त्रालयका अनुसार यो कारबाही अप्रिल २२ मा कश्मीरको पहलगाममा भएको आतंकवादी आक्रमणको प्रतिशोध थियो। सो आक्रमणमा हिन्दू तीर्थयात्रीहरू मारिएका थिए, जसको जिम्मेवारी पाकिस्तानमा आधारित ‘द रेसिस्टेन्स फ्रन्ट’ले लिएको थियो।

पाकिस्तानले भारतको आक्रमणमा कम्तीमा ३१ जना नागरिकको ज्यान गएको बताएको छ। तीमध्ये महिला र बालबालिकासमेत परेका छन्।

अर्कोतर्फ, भारतले पनि पाकिस्तानबाट भएको जवाफी हमला (तोप र ड्रोन आक्रमण) मा १३ जनाको मृत्यु भएको पुष्टि गरेको छ।

पाकिस्तानी प्रधानमन्त्री शहबाज सरिफले संसदमा सम्बोधन गर्दै भारतको कारबाहीलाई ‘युद्धको घोषणा’ भनेका छन्। उनले भने, “हामी हाम्रा निर्दोष नागरिकहरूको रगत खेर जान दिने छैनौँ।”

साथै, पाकिस्तानी सेनाले भारतका पाँचवटा लडाकु विमान खसालेको दाबीसमेत गरेको छ, यद्यपि भारतले त्यसको पुष्टि गरेको छैन।

दुवैतर्फ सयौं सुरक्षाकर्मी तयारी अवस्थामा छन् भने सीमावर्ती गाउँहरूमा त्रास फैलिएको छ। अन्तर्राष्ट्रिय समुदाय, विशेषगरी संयुक्त राष्ट्रसंघ र अमेरिका, ले तत्काल संयमता अपनाउन आग्रह गरेका छन्।

क्षेत्रीय सन्तुलनमा असर

विश्लेषकहरूका अनुसार सन् २०१९ को बालाकोट स्ट्राइकपछि भारत–पाकिस्तानबीच यति गम्भीर भिडन्त पहिलोपटक देखिएको हो। दुबै मुलुक आणविक शक्ति सम्पन्न भएकाले सानो भिडन्त पनि ठूलो संकटमा परिणत हुने चिन्ता देखिएको छ।