सुनसरी/ सुनसरीको हुलाकी राजमार्ग खण्डमा लागू औषध गाँजाको ओसारपसार भइरहेको गोप्य सूचनाका आधारमा प्रहरीले विशेष चेकजाँच चलाउँदा २४ केजी गाँजासहित एक युवकलाई पक्राउ गरिएको छ।
ईलाका प्रहरी कार्यालय हरिनगराबाट खटिएको गस्ती टोलीले मंगलबार साँझ ७:५० बजे फुलचोक–विराटनगर सडकखण्डमा रातो–कालो रंगको पल्सर मोटरसाइकल रोकेर चेकजाँच गर्न खोज्दा सो मोटरसाइकल प्रहरीलाई नटेरी तीव्र गतिमा भागेको थियो।
प्रहरीले तत्कालै पिछा गर्दै हरिनगरा गाउँपालिका–४ को बजार क्षेत्रमा स्थानीयवासीको सहयोगमा मोटरसाइकलको पछाडि सवार युवकलाई नियन्त्रणमा लिएको हो।
पक्राउ पर्ने युवक सप्तरी कञ्चनपुर स्थायी ठेगाना भएका र हाल सुनसरी बराहक्षेत्र नगरपालिका–६ चक्रघट्टीमा बसोबास गर्दै आएका २४ वर्षीय राजेश मुखिया रहेको जिल्ला प्रहरी कार्यालय सुनसरीले जनाएको छ।
मुखियाको साथबाट बोकेको दुईवटा झोलामा गरी करिब २४ किलो गाँजा बरामद गरिएको प्रहरीले जानकारी दिएको छ।
हाल उनलाई थप अनुसन्धानका लागि जिल्ला प्रहरी कार्यालय सुनसरीमा राखिएको छ भने फरार मोटरसाइकल चालकको खोजी कार्य जारी रहेको प्रहरीको भनाइ छ।
