_1693980289.gif "#")
धरान/ एकताका सुनसान रहेको बगर आजकल पर्यटकको आकर्षणको केन्द्र बनेको छ।
धरान उपमहानगरपालिकाका मेयर हर्कराज साम्पाङको अगुवाइमा श्रमदानमार्फत् निर्माण हुँदै गरेको श्रम संस्कृति पार्क अहिले चर्चामा छ, त्यो पनि अझै पूर्णरूपमा निर्माण नसकिँदै।
नयाँ वर्ष २०८२ को पहिलो दिन बैशाख १ गते, पार्कमा सयौंको संख्यामा पर्यटक तथा पाहुनाको घुइँचो लागेको थियो।
आन्तरिक र बाह्य पर्यटकको बाढीले धरानको यो अधूरो प्रयासले पनि ठूलो सम्भावना बोकेको पुष्टि गरेको छ।
माटो र पसिनाले सिँगारिएको यो पार्कमा आज कलात्मक मूर्तिहरू, विभिन्न जातजातीका विरुवा, वाटर फाउन्टेन, गोरखा चौतारी, आरा धरानलगायतका संरचना बनेका छन्।
मूर्तिकार रोजेन राई भन्छन्, “बगरको सूनसान जमिनलाई प्रेम र मेहनतले कला बनाइदियौं।”
यस अभियानमा देशविदेशमा रहेका धरानेहरूले श्रम र सहयोग जुटाएका छन्।
एसडिएस रक गार्डेन, एसएनएस चौतारी, एसडिबी रोज गार्डेन, गोरखा चौतारी, आरा धरानजस्ता संरचनाहरू सचेत नागरिक तथा स्वतन्त्र समूहको सक्रियतामा निर्माण भएका हुन्।
धरानबाहिरबाट झापा, मोरङ, उदयपुर, धनकुटालगायतका जिल्लाबाट सयौं पर्यटक आउने क्रम बढ्दो छ। पार्कमा टिकटबाट मात्रै नयाँ वर्षमा करिब ३ लाख रुपैयाँ संकलन भएको धरान उपमहानगरले जनाएको छ।
फागुन महिनामा मात्र ८४ हजार रुपैयाँ आम्दानी भएको थियो।
मेयर साम्पाङ भन्छन्, “श्रमले बनेको पार्क हो यो, यही माटोमा पर्यटनको भविष्य देखिन्छ।”
यता कोशी प्रदेश सरकारले २०८२ साललाई कोशी पर्यटन वर्षको रूपमा घोषणा गरिसकेको छ। “यस वर्षको अभियानले धरानजस्ता गन्तव्यलाई स्थापित गर्न अवसर मिलेको छ,
अधूरो संरचना भए पनि, धरानको यो पार्कले ‘श्रमबाट सम्भावना’को नयाँ कथा लेख्न थालेको छ — जहाँ साम्पाङको अभियानले धरानलाई पुनः एकपटक शान बनाइरहेको छ।
