_1693980289.gif "#")
चतरा/ भरौल गोल्डकपको आठौं संस्करणमा द योङ ब्रदर्स क्लब इटहरीले आफ्नो नाम स्वर्ण अक्षरले लेख्न सफल भएको छ। नेपाल पुलिस फुटबल क्लबलाई टाइब्रेकरमा ३-१ गोल अन्तरले पराजित गर्दै योङ ब्रदर्सले पहिलो पटक प्रतिष्ठित उपाधि उचाल्यो।
गोलरहित संघर्ष, टाइब्रेकरमा निर्णय
दुवै टोलीबीचको खेल निकै प्रतिस्पर्धात्मक रह्यो। निर्धारित ९० मिनेट र अतिरिक्त समयसम्म कुनै पनि टोलीले गोल गर्न सकेन।
पेनाल्टी सुटआउटमा नेपाल पुलिस क्लबका खेलाडीहरूको कमजोर प्रदर्शनको फाइदा उठाउँदै योङ ब्रदर्सले ३-१ को सहज जित निकाल्यो।
विजेताको गौरवशाली यात्रा
उपाधिसँगै योङ ब्रदर्स क्लबले नगद ४ लाख रुपैयाँ, ट्रफी र मेडल हात पार्यो भने उपविजेता नेपाल पुलिस क्लबले २ लाख रुपैयाँसहित ट्रफी र मेडल प्राप्त गर्यो। पुरस्कार बराहक्षेत्र नगर प्रमुख रमेश कार्की, एन्फाका मानार्थ वरिष्ठ उपाध्यक्ष तथा कोशी प्रदेश फुटबल सङ्घका अध्यक्ष किशोर राई, कीर्तिमानी धावक तथा बराहक्षेत्र-४ का वडाध्यक्ष आशाराम चौधरी लगायत उच्च पदस्थ व्यक्तित्वहरूले हस्तान्तरण गरे।
व्यक्तिगत विधामा पनि द योङ ब्रदर्सको दबदबा
सर्वोकृष्ट खेलाडी: प्रवेश दनुवार (द योङ ब्रदर्स) - नगद २५ हजार रुपैयाँसहित ट्रफी।
मन अफ द म्याच (फाइनल खेल): मौसम लिम्बू (द योङ ब्रदर्स) - नगद पुरस्कारसहित ट्रफी।
उत्कृष्ट गोलकिपर: विश्वास चौधरी (द योङ ब्रदर्स)।
उत्कृष्ट डिफेन्डर: सबिन घिमिरे (द योङ ब्रदर्स)।
उत्कृष्ट मिडफिल्डर: प्रवीण थापा (नेपाल पुलिस क्लब)।
उत्कृष्ट स्ट्राइकर: विवेक पाण्डे (नेपाल पुलिस क्लब)।
उत्कृष्ट प्रशिक्षक: विमल मगर (द योङ ब्रदर्स)।
सबै विधागत उपाधि विजेताहरूले १० हजार रुपैयाँ नगदसहित ट्रफी, मेडल तथा प्रमाणपत्र प्राप्त गरे।
नगरले खेलकुद प्रवर्द्धनमा जोड दिने प्रतिबद्धता
बराहक्षेत्र नगर प्रमुख रमेश कार्कीले प्रतियोगितालाई नजिकबाट नियालेको उल्लेख गर्दै खेलकुद प्रवर्द्धनका लागि नगरपालिकाले आवश्यक बजेट विनियोजन गर्ने प्रतिबद्धता व्यक्त गरे।
कोशी प्रदेश फुटबल सङ्घका अध्यक्ष किशोर राईले खेल क्षेत्रको विकासका लागि नगरको ५ देखि १० प्रतिशत बजेट खेलकुदका लागि छुट्याउनुपर्नेमा जोड दिए।
गोल्डकपको सफल आयोजना
प्रतियोगिता आयोजक न्युस्टार क्लबका अध्यक्ष भेषराज कार्कीको सभाध्यक्षतामा समापन कार्यक्रम सम्पन्न भयो।
आठौं संस्करणको यो प्रतियोगिता स्थानीय तथा राष्ट्रिय खेलाडीहरूका लागि महत्वपूर्ण मञ्च बनेको आयोजकले जनाएको छ।
भरौल गोल्डकप २०८१: फुटबल प्रेमीहरूको यादगार उत्सव!
