फागु पूर्णिमा आज: रङको पर्वले देशभरि उत्साह

काठमाडौं/ हर्षोल्लास, रङ र उमंगको पर्व फागु पूर्णिमा (होली) आज पहाडी तथा हिमाली क्षेत्रमा उल्लासपूर्वक मनाइँदैछ। वसन्त ऋतुको आगमनसँगै आउने यो पर्व हिन्दू धर्मावलम्बीहरूले विशेष रुपमा मनाउने गर्छन्।

राजधानी काठमाडौंसहित देशभरका विभिन्न स्थानमा रंग, अबिर, पानीका फोका र संगीतको माहोल देखिएको छ। युवायुवतीदेखि वृद्धवृद्धासम्म होलीको रङमा रमाइरहेका छन्।

सरकारले सार्वजनिक बिदा दिएको हुँदा मानिसहरू खुलेर रमाइरहेका छन्।

तराईका जिल्लाहरूमा भने भोलि होली मनाइनेछ। होली पर्व विशेष गरी मित्रता, आपसी सद्भाव र भाइचारा प्रकट गर्ने अवसरका रूपमा लिइन्छ।

सामाजिक सञ्जालहरूमा पनि होलीका तस्बिर र शुभकामना सन्देशहरू भाइरल भइरहेका छन्।

यस पर्वलाई मर्यादित तरिकाले मनाउन सुरक्षा निकायले विशेष निगरानी राखेको छ। ट्राफिक प्रहरी तथा नेपाल प्रहरीको टोली मुख्य सहरका चोकहरूमा परिचालित छन्।

विशेषज्ञहरूका अनुसार रासायनिक रंगको प्रयोगले छालामा असर गर्न सक्छ, त्यसैले प्राकृतिक रङको प्रयोग गर्न सल्लाह दिइएको छ।

होलीको अवसरमा "कोशीपत्र परिवार" सम्पूर्ण पाठकहरूमा सुख, शान्ति र समृद्धिको शुभकामना व्यक्त गर्दछ।