_1693980289.gif "#")
सुनसरी/ वराहक्षेत्र नगरपालिकामा जारी तेस्रो संस्करणको वडा स्तरीय "वराहक्षेत्र मेयर लिग कप रनिङ शिल्ड" फुटबल प्रतियोगितामा वडा नं ५ सेमिफाइनलमा प्रवेश गरेको छ।
बुधबार सम्पन्न दोस्रो क्वाटरफाइनल खेलमा वडा नं ५ ले वडा नं ४ लाई २-० गोल अन्तरले पराजित गर्दै अन्तिम चारमा स्थान सुरक्षित गरेको हो। समुह ‘बि’ बाट बिजेता हुँदै क्वाटरफाइनल प्रवेश गरेको वडा नं ५ ले समूह ‘सि’ बाट तेस्रो हुँदै क्वाटरफाइनल पुगेको वडा नं ४ लाई पराजित गरेको हो।
बिजयसँगै वडा नं ५ अब फाइनल प्रवेशका लागि वडा नं १ र वडा नं ९ को बिजेता टोलीसँग प्रतिस्पर्धा गर्नेछ। वडा नं १ समूह ‘ए’ को दोस्रो टोली हो भने वडा नं ९ समूह ‘बि’ बाट दोस्रो हुँदै क्वाटरफाइनलमा प्रवेश गरेको हो।
खेलमा उत्कृष्ठ प्रदर्शन गरेका वडा नं ५ का पामस तामाङ "म्यान अफ द म्याच" घोषित भए। उनले नगद २,१०० रुपैयाँ र ट्रफी प्राप्त गरे।
प्रतियोगिता अन्तर्गत बिहीबार हुने तेस्रो क्वाटरफाइनलमा समूह ‘बि’ को तेस्रो टिम वडा नं ८ र समूह ‘सि’ को बिजेता टिम वडा नं २ बीच प्रतिस्पर्धा हुनेछ।
नगर खेलकुद विकास समितिको आयोजनामा जारी प्रतियोगिता वराहक्षेत्र नगरपालिका वडा नं ७, देविघाटस्थित बसन्त ऋतु माध्यमिक विद्यालयको खेलमैदानमा भइरहेको छ।
प्रतियोगिताले "खेलकुद हाम्रो सान, खेलाडी उत्पादन गर्ने हाम्रो अभियान" भन्ने नारालाई आत्मसात् गरेको आयोजक समितिले जनाएको छ।
_Poush 22_1736170149.jpg "#")