_1693980289.gif "#")
धरान / प्रतिमा खतिवडा निरौलाले सम्पादन गरेको कृति ‘जीवन र जीवनी’ शनिबार यहाँ लोकार्पण गरिएको छ। पूर्वप्रदेश प्रमुख प्राडा गोविन्द तुम्बाहाङ,वरिष्ठ समालोचक दधिराम सुवेदी, प्राडा गोपाल भण्डारी,अग्रज कवि बम देवानलगायतले कृति लोकार्पण गरेका थिए ।
सो कृतिमा भाषा–साहित्य, शिक्षा तथा समाजका अन्य क्षेत्रमा लामो समय बिताएका ३० जना अग्रजहरूको आत्मवृत्तान्त सङ्कलित छन्। आत्मसंस्मरणात्मक रचनाहरूमा सम्बन्धित व्यक्तित्वहरूले आफना बाल्यकालीन,भोगाइ, सङ्घर्ष र अनुभवहरू आफैले प्रस्तुत गरेका छन् ।
डा रमेश घिमिरे उपप्राध्यापक राजेश विद्रोही र रामप्रसाद खरेलले पुस्तकबारे चर्चा गरेका थिए । चर्चाकारहरूले नयाँ पुस्तालाई मार्गनिर्देशन गर्न पुस्तक उपयोगी हुने धारणा राखेका थिए । सफलता सजिलै प्राप्त नहुने,त्यसका लागि दृढ सङ्कल्प र लक्ष्यप्रति समर्पण आवश्यक हुने ज्ञान पुस्तकका रचनाहरूबाट प्राप्त हुने उनीहरूले बताए ।
विराटनगरको पूर्वाञ्चल साहित्य प्रतिष्ठानद्वारा प्रकाशित पुस्तकको लोकार्पण तथा विमर्श कार्यक्रम कलरव धरानले आयोजना गरेको थियो । कवि सुदीप पाख्रिनको अध्यक्षतामा सम्पन्न कार्यक्रममा पूर्वप्रदेश प्रमुख प्राडा तुम्बाहाङ, वरिष्ठ समालोचक सुवेदी, प्राडा भण्डारी, अग्रज कवि देवान तथा युवाकविहरू राज माङ्लाक र इन्दु योञ्जनलगायतले पनि बोलेका थिए ।
