_1693980289.gif "#")
मोरङ/ व्यवसायीहरुले अर्थमन्त्री विष्णुप्रसाद पौडेललाई भेट गरी बर्तमान बैंकिङ जटिलताका विषयमा जानकारी गराउँदै समाधान गरिदिन आग्रह गरेका छन् ।
मोरंग व्यापार संघका अध्यक्ष नवीन रिजालले अर्थमन्त्री पौडेललाई भेट गरी विद्यमान बैंकिङ जटिलताहरु निराकरणका लागि पुनः पहल गरेका हुन् ।
संघका अध्यक्ष रिजाल सहित उद्योग संगठन मोरङका उपाध्यक्ष नन्द किशोर राठीले अर्थ मन्त्रीलाई भेट गर्दै बैंकहरुको उच्च प्रिमियम दरका कारण बैंक व्याज दर चर्को हुन गएको बताउँदै बढीमा एक प्रतिशत मात्र प्रिमियम थप गर्न पाउने व्यवस्था ल्याउन अनुरोध गरेका थिए ।
उनीहरुले बैंकहरुले पछिल्लो अवस्थामा बैंकिङ शुल्कहरु अचाक्ली रुपले बढाएकोले त्यसलाई समेत न्यून गराउन पहल गरिदिन आग्रह गरेका थिए ।
अध्यक्ष रिजालले मोरंग व्यापार संघको विगतका पहलहरुबाट नेपाल राष्ट्र बैंक र बैंकहरुले निक्षेप लगायतका व्याजहरुमा केही लचकता अपनाएकोमा धन्यवाद दिएका थिए । उनले ऋणीहरुको व्याज दर घटाउने काममा सरकार सम्वेदनशील नभएको बताएका थिए ।
सो अवसमार अर्थमन्त्री पौडेलले विद्यमान निजी क्षेत्रका उद्योगी व्यवसायीहरुको पछिल्लो खस्कँदो अवस्थालाई ध्यानमा राखी नेपाल राष्ट्र बैंकले केही लचकता अपनाउनुपर्नेमा जोड दिएका थिए ।
