_1693980289.gif "#")
मोरङ /सरकारले आगामी फागुन २५ गते राष्ट्रपतिको निर्वाचन तोकिसकेको अवस्थामा नेकपा एमालेका पोलिट्ब्युरो सदस्य गोकुल बास्कोटाले राष्ट्रपति निर्वाचनमा माओवादीले एमालेलाई सघाउनैपर्ने बताएका छन् ।
विराटनगरमा नेकपा एमालेको भातृ संगठन नेपाल खेलकुद महासघले सोमबार आयोजना गरेको पत्रकार सम्मेलनमा पूर्व मन्त्री समेत रहेका बास्कोटाले राष्ट्रपति निर्वाचनमा माओवादीले नसघाए माओवादी केन्द्र भद्रगोल हुने देखिएको बताए । उनले भने ‘माओवादी केन्द्रले राष्ट्रपति निर्वाचनमा एमालेलाई सघाउन आवशयक छ, नत्र माओवादी केन्द्र भद्रगोल अवस्थामा पुग्छ ।
उनले सरकार गठनका समयमा गरिएको सहमति अनुसार भएपनि नैतिकताको आधारमा माओवादी केन्द्रले एमालेलाई सघाउनै पर्ने बताए । उनले भने‘राजनीतिक परिवर्तनले मात्र भद्रगोल हुन्छ भनेर भनेको होइन, देशकै भद्रगोल हुन्छ, सधै षड्यन्त्रको राजनीति गरेर कहीँ पुग्न नसकिने भएकोले परिवर्तनको राजनीति रोज्नुपर्छ अबको राजनीति परिवर्तनको राजनीति हुनुपर्छ ।
उनले अब पनि राजनीतिक खेल भयो भने देश दुर्घटनामा जान सकने बताउँदै मध्यावधि चुनाव हुन सक्ने र मुलुकलाई आर्थिक भार पर्ने बताए । उनले भने ‘माओवादी केन्द्रले एमालेलाई नसघाए देश तुरुन्तै फेरि मध्यावधितिर जानुपर्ने अवस्था पनि आउन सक्छ, त्यसलै दलहरूले अब चेत्नुपर्छ ।’ चुनावको परिणामलाई हेर्दा कसैको बहुमत नआएकाले अब दलहरूले चेत्नुको विकल्प नै नरहेको नेता बाँस्कोटाले बताए ।
